Wilhelmine Witte

Vun Wikipedia

Wilhelmine Sophie Elisabeth Witte (borene Böttcher; * 17. November 1777 in Hannover; † 17. September 1854 ok dor) weer en düütsche Astronomin.

Böttcher is 1777 as Dochter von Johanne Sophie Marie, borene Brinkmann (5. Januar 1755–25. November 1824), un den Fabrikant un Senater Gottfried Ernst Böttcher (16. Februar 1750–16. Oktober 1823) in Hannover boren. Se hett hett an’n 17. November 1797[1] den Kunsistorial- un Hoffraad Friedrich Christian Witte (1773–1854) freet. De beiden harrn 14 Kinner, ünner annern Friedrich Ernst Witte (1803–2. September 1872) un Minna Witte (15. Oktober 1804–5. März 1891).

Se weer privaat temlich intresseert an Astronomie un hett sik 1815 en egen Teleskoop (en Fraunhofer-Refrakter) köfft.[2] [3] Stahn dee dat in de Friedrichstrate in Hannover. Op de Basis von dat, wat se sülvs beobacht hett un de Maandkoorten von Johann Heinrich von Mädler hett Witte en Maandglobus ut Wass boot.[2] Düssen Globus hett se 1838 John Herschel wiest un in’n September 1839 ok op de Deutsche Naturforschertagung in Purmunt vörstellt.[2] He harr en Dörmeter von 34 Zentimeter (1:10.000.000).[4] 1840 is de Globus ok in Berlin utstellt worrn.[2] In’n Januar 1841 hett de Königliche Kunstkamer em köfft.[2]

Witte hett aver noch wedder en ne’en Globus boot, de in’n Harvst 1844 trech worrn is.[2] Düssen ne’en Globus hett Herschel 1845 in Cambridge vörstellt.[2]

Den Globus hett Witte ehr Dochter Minna arvt. As Minna 1891 doodbleven is, güng de Globus an dat Kestner-Museum, dat em 1972 an dat Histoorsche Museum an’t Hoge Över in Hannover afgeven hett.[2]

Ehr to Ehren hett 2006 en Krater op de Venus den Naam Witte Patera kregen.[5] In’n Stadtdeel Kerkreoe von de Stadt Hannover hett 2011 en ne’e Straat den Naam Wilhelmine-Witte-Strate kregen.[2]

Footnoten[ännern | Bornkood ännern]

  1. Deutsches Geschlechterbuch, Band 129, Sied 114
  2. a b c d e f g h i Drucksache Nr. 0426/2011: Straßenbenennungen im Stadtteil Kirchrode
  3. Westermann's illustrierte deutsche Monatshefte, Ausgabe 13, Braunschweig 1863, Sied 396
  4. Der Globusfreund: wissenschaftliche Zeitschrift für Globen- und Instrumentenkunde. Coronelli-Weltbund der Globusfreunde, 1999, Utgaven 47-48, Sied 294ff
  5. Amateurastronomin mit Venuskrater geehrt. spektrum.de an’n 28. November 2006