TuS Güldenstern Stood

Vun Wikipedia
Trikots
Trikotklören
Trikotklören
Trikotklören
Trikotklören
Trikotklören
Tohuus
Trikotklören
Trikotklören
Trikotklören
Trikotklören
Trikotklören
Trikotklören
Utwards
Luftbild von Stood mit de Sportplätz op de Camper Höh

De TuS Güldenstern Stood (Turn- un Sportvereen Güldenstern Stood e.V.) weer en Sportvereen ut Stood. De Vereen hett en Reeg Sportoorden anbaden, de wichtigste weer aver de Football. De eerste Mannschop von Güldenstern hett von 2010 bet 2012 in de Oberliga Neddersassen speelt. Bet 1990 hett de Vereen to’n Speelbereich Hamborg höört un is denn na Neddersassen wesselt.

De Vereen hett sik 2016 mit’n VfL Stood to’n VfL Güldenstern Stood tohoopslaten. De Vereen harr toletzt üm un bi 780 Liddmaten.

Historie[ännern | Bornkood ännern]

In’n Juni 1924 hett en Grupp von 23 Schölers ut Stood in dat Gasthuus Studt den Vereen grünnt. De Naam Güldenstern kummt von de Güldenstern-Bastion (nöömt na’n sweedschen General Nils Güldenstern) in Stood, op de sik de Schölers siet 1922 drapen harrn, üm Football to spelen. De Vereen hett sik nich den Speelbereich von’n DFB anslaten, man von’n ATSB. Dor hett de Vereen gau Spood hatt un is 1931 Stadtmeester worrn. 1932 hett de Vereen sien egen Sportanlaag anleggt. 1933 na de Machtövernahm von de Natschonalsozialisten müss de Vereen sik oplösen, denn de Arbeidersportverenen sünd na de Machtergreifung verbaden worrn. Veel Liddmaten von’n Vereen sünd dorüm na’n börgerlichen Naverclub Camper TV ut Kamp wesselt.

Na’n Tweten Weltkrieg sünd de SC Güldenstern un de Camper TV tohoopgahn. De ne’e Vereen hett denn TuS Güldenstern Stood heten. Offiziell nee grünnt worrn is de Vereen an’n 13. September 1945. Güldenstern weer 1950 Grünnungsmaat von de eengleisige Amateurliga Hamborg, wat to de Tied de tweethöögste Klass in Düütschland weer. 1953 is de Vereen de Drüdde in de Liga worrn un hett sik dormit för de Ennrunn von de Düütsche Amateurmeesterschop qualifizeert. Dor is de Vereen blots bet in de Vörrunn kamen. Bi dat Speel an’n 24. Mai 1953 vör 25.000 Zuschauern in dat Berliner Olympiastadion gegen Hertha Zehlendörp sünd se mit en 0:6 utscheden.

Na düsse Tied kemen Johren, in de de Vereen faken op- un afstegen is. 1963 hett de Sportplatz op de Camper Höh apenmaakt, de bet vondaag bruukt warrt. In de Saison 1973/1974 hett de Störmer Horst Haecks, de vörher bi’n FC St. Pauli weer, in Stood sien Karjeer utklingen laten. In de höögste Hambörger Speelklass is de Vereen blots af un to kamen, toletzt 1980 bet 1982. In de Johren 1980 hett sik mehr un mehr de Lokalrivale VfL Stood as wichtigsten Stoder Vereen dörsett. De VfL is bet in de Oberliga Noord opstegen. 1990 is Güldenstern von’n Hambörger Verband in’n neddersassischen wesselt.

Dor güng dat bilütten wedder bargop. 1994 is de Vereen in de Neddersassenliga Oost opstegen un hett sik dor fiev Johr hollen. Denn is de Vereen wedder op de Bezirksebene afstegen. In de Saison 2006/2007 is Güldenstern wedder in dat neddersassische Oberhuus opstegen. Dree Saisons hett de Vereen sik hollen un hett in’t Middelfeld mitspeelt. De Saison 2009/2010 weer denn de letzte Saison för de Staffel, in de Güldenstern toletzt speelt harr: De Ooststaffel Neddersassen is mit de Weststaffel to de ne’e Oberliga Neddersassen vereenigt worrn. Güldenstern weer an’t Saisonenn op Platz 10, wat en Platz in de Relegatschoon bedüden dee. Dor weer de Vereen Gruppenwinner vör’n FC Schüttrup 09, den SC Langenhagen un Arminia Hannover un kunn sik för de Oberliga qualifizeren. In de Saison 2010/2011 kunn de Vereen aver nix utrichten un is mit Afstand de Letzte in de Liga worrn un in de sösstklassige Landsliga Lümborg afstegen.

To’n 1. Juli 2016 is de TuS Güldenstern Stood mit’n JFV Stood un den VfL Stood tohoopgahn un billt nu den VfL Güldenstern Stood.

Stadion un Fans[ännern | Bornkood ännern]

Dat Stadion Camper Höh is siet 1963 de Tohuusplatz för den Klub. He hett Platz för 4.500 Tokiekers. Architektoonsch domineert de Tribüün, de Rest besteiht blots ut en poor Stufen. Üm den Platz gifft dat en Tartanbahn. In’n Snidd weren in de Saison 2009/2010 320 Tokiekers bi de Spelen von Güldenstern dorbi. De höögste Tall weren 1.850 Tokiekers bi dat Speel gegen Lokalrivale SV Drochters/Aßel.

De Fanklub von de Oberligamannschop hett sik 2007 grünnt un heet Garcia Güldenstern. Rivalitäten hett dat besünners to den lokalen Kuntrahenten in de Oberliga geven: SV Drochters/Aßel un TuS Heeßel, aver ok to’n VfL Stood. Dat hett ok histoorsche Grünn, denn de VfL stünn fröher in’n Gegensatz to de Grünners von’n TuS, de Arbeiders weren, jümmer för dat Börgerdom. En Fanfründschop hett mit de Fans von’n MTV Gifhorn bestahn.

Präsident[ännern | Bornkood ännern]

Football-Spelers[ännern | Bornkood ännern]

Annere Sportoorden in’n Vereen[ännern | Bornkood ännern]

To de annern Sportoorden in’n Vereen hebbt Badminton, Lichtathletik, Swemmen, Kegeln, Dischtennis un Fitness tellt.

Literatur[ännern | Bornkood ännern]

  • Andreas Meyer/Volker Stahl/Uwe Wetzner: Fußball Lexikon Hamburg. Göttingen 2007 (Die Werkstatt), ISBN 3-89533-477-4
  • Hardy Grüne: Vor 25.000 im Berliner Olympiastadion in Legendäre Fußballvereine Norddeutschland, Kassel 2004 (Agon), ISBN 3-89784-223-8