Robin Williams

Dit Woort hett noch annere Bedüden: kiek dorför ünner Robin Williams (Mehrdüdig Begreep).

Robin William (2011)

Robin McLaurin Williams (* 21. Juli 1951 in Chicago, Illinois; † 11. August 2014 bi Tiburon, Marin County, Kalifornien) weer en US-amerikaanschen Schauspeler un Komiker. Bekannt worrn is he 1978 dör de Sitcom Mork & Mindy. He hett in en grote Tall vun Kummedien un Filmdramas mitspeelt.

Leven un Wark

Williams is in go’e Ümstännen in Chiacago un Bloomfield Hills in de Neeg vun Detroit opwossen. Sien Mudder Laura McLaurin hett en Modelagentur grünnt un sien Vadder Robert Fitzgerald Williams harr en leiden Steed bi Ford. In de Tiet, as he op de Highschool weer leev he in Los Angeles un in Tiburon, en Vööroort vun San Francisco.

Dorna füng he op’t College en Studium vun de Politikwetenschop an, wat he aver nich toenn bröcht hett. He wessel in de Theaterklass, de he aver ok afbroken hett. He hett en Improvisatschoonsseminar beleggt un güng as Stand-Up-Comedian in de Grupp „The Comedy of San Francisco“. As de Juilliard School, een vun de ansehnsten Schauspeelscholen vun de USA, en Vörspreken in San Francisco maken de, hett he deelnahmen un weer dor opnahmen.

As he 21 Johren oolt weer, is he na New York City tagen, woneem he sik mit sien Klassenliddmaat Christopher Reeve anfrünnt hett. De beiden weern as eenzige vun jemehrn Johrgang in de högere Klass vun John Houseman opnahmen. Na dree Johren is he torüch gahn na San Francisco un is 1975 wedder as Stand-Up-Comedian in’t „Comedy Store“ optreden. 1977 hett George Schlatter em sehn, de Produzent vun de Kummedie-Show Laugh-In, un hett em för söss Folgen blangen Frank Sinatra un Bette Davis optreden laten. 1978 harr he en Gastoptritt as de Butenirdische Mork in en Folg vun de Sitcom Happy Days. De Direkter vun Paramount Pictures hett dorophen en Feernsehreeg för disse Figur utklamüstert. Dör sien Rull in Mork & Mindy (dt.: Mork vom Ork) is Williams över Nacht to’n Star worrn.

Williams bi de Oscarvergaav 1990 mit de Journalistin Yola Czaderska-Hayek

1980 kreeg Williams en Grammy för de Best Comedy-Opnahm (Reality … What a Concept). Sien eerste Filmrull harr he in’t glieke Johr in Popeye, de aver keen Spood harr. Twee Johren later kreeg he go’e Kritiken mit den Film Garp. Sien Dörbrook keem 1987 mit den dramaatschen Kinofilm Good Morning Vietnam, för den he för hoge Filmpriesen nomineert weer. Wietere grote Filmen, in de Williams mitspeelt hett, weern ünner annern Dead Poets Society (1989), Awakenings (1990) oder The Fisher King (1991). Dör disse Filmen kreeg he den Roop, dat he en goot Geföhl för dramaatsche Rullen harr.

Vun 1991 an hett he in en Reeg vun Kinner- un Jöögdfilmen mitspeelt, so as Hook (1991) oder Flubber (1997). Groten Spood harr he in de 1990er Johren ok mit Mrs. Doubtfire (1993), Jumanji (1995), The Birdcage (1996) oder Good Will Hunting (1997), för den he mit en Oscar uttekent weer.

Na 2000 geev Williams sik Möh, sien Image to ännern un speel dorophen en Tiet lang Psychopathen un slechte Figuren. Ok sien Schauspeel af vun de Lienwand is vun de Kritikers goot opnahmen worrn. 2006 harr he de Hööftrull in RV: Runaway Vacation, mit den he torüch na’n Kinnerfilm keem. 2013 hett he wedder en faste Rull in en Feernsehreeg för de Sitcom The Crazy Ones övernahmen. Man, de Reeg lööp nich goot un weer vun’n Senner CBS in’n Mai 2014 na blots een Staffel wedder afsett. Blangen de Schauspeleree hett he ok as Spreker för Trickfilmen arbeit.

Privatleven

1978 hett Williams sien eerste Fro Valerie Velardi heiraat, mit de he 1983 en Söhn kregen hett. In’t Johr 1989 hett he den sien Kinnermaagd Marsha Garces heiraat. Mit ehr harr he twee Kinner. In’t Fröhjohr 2008 hett Garces sik aver vun em scheden laten. Sien drüdde Fro Susan Schneider hett Williams in’n Oktober 2011 heiraat.

He hett geern Fohrrad föhrt un hett faken ok de Tour de France besöcht. As Kind hett he sien egen Vertellen na Tinnsoldaten sammelt. Över de United Service Organizations is he butendem regelmatig vör US-amerikaansche Truppen optreden.

William hett ünner Depresschonen leden, weer Alkoholiker un hett tietwies Kokain nahmen. Man, siet sien Fründ John Belushi 1982 an Drogen doodbleven is, gell he as abstinent – noch vör de Geborrt vun sien öllsten Söhn . In’n Sommer 2006 harr he en Trüchfall, güng aver gliek dorop wedder na en Afwennkur. In’n Harvst 2006 hett he sien Arbeit wedder opnahmen. Mit sien Sucht güng he apen üm un hett to’n Bispeel ok in de britischen Late-Night-Talkshow Parkinson doröver snackt.

An’n 11. August 2014 is Williams dood in sien Wahnung in Tiburon, Kalifornien opfunnen worrn. Henwiesen düden op Sülvstmoord.

Filmografie (Utwahl)

Johr	Titel	Synchroonsnacker
1977	Can I Do It ’Till I Need Glasses?
1980	Popeye dt.: Popeye, der Seemann mit dem harten Schlag	Wolfgang Pampel
1978-82	Mork & Mindy dt.: Mork vom Ork	Peter Ehret (1. Synchro) Andreas Lachnit (2. Synchro)
1982	The World According to Garp dt.: Garp und wie er die Welt sah	Wolfgang Condrus
1983	The Survivors dt.: Die Überlebenskünstler	Engelbert von Nordhausen
1984	Moscow on the Hudson dt.: Moskau in New York	Jürgen Kluckert
1986	The Best of Times dt.: Rocket Man – Der Beste aller Zeiten	Reinhard Glemnitz
1986	Seize the Day dt.: Das Geschäft des Lebens	Peer Augustinski
1987	Good Morning, Vietnam	Peer Augustinski
1989	Dead Poets Society dt.: Der Club der toten Dichter	Peer Augustinski
1990	Cadillac Man	Peer Augustinski
1990	Awakenings dt.: Zeit des Erwachens	Peer Augustinski
1991	Hook	Peer Augustinski
1991	The Fisher King dt.: König der Fischer	Peer Augustinski
1992	Aladdin	Jürgen Kluckert
1992	Toys	Peer Augustinski
1993	Mrs. Doubtfire dt.: Mrs. Doubtfire – Das stachelige Kindermädchen	Peer Augustinski
1994	Being Human dt.: Wer hat meine Familie geklaut?	Peer Augustinski
1995	Jumanji	Peer Augustinski
1996	The Birdcage dt.: The Birdcage – Ein Paradies für schrille Vögel	Peer Augustinski
1996	Jack	Peer Augustinski
1997	Father’s Day dt.: Ein Vater zuviel	Peer Augustinski
1997	Flubber	Peer Augustinski
1997	Good Will Hunting	Peer Augustinski
1998	What Dreams May Come dt.: Hinter dem Horizont	Peer Augustinski
1998	Patch Adams	Peer Augustinski
1999	Jakob the Liar dt.: Jakob der Lügner	Peer Augustinski
1999	Bicentennial Man dt.: Der 200 Jahre Mann	Peer Augustinski
2002	One Hour Photo	Peer Augustinski
2002	Death to Smoochy dt.: Tötet Smoochy	Peer Augustinski
2004	The Final Cut	Peer Augustinski
2005	The Big White dt.: The Big White – Immer Ärger mit Raymond	Bodo Wolf
2006	The Night Listener dt.: The Night Listener – Der nächtliche Lauscher	Bodo Wolf
2006	RV dt.: Die Chaoscamper	Lutz Mackensy
2006	Man of the Year	Kai Wulff (1. Synchro) Bodo Wolf (2. Synchro)
2006	Night at the Museum dt.: Nachts im Museum	Bodo Wolf
2007	License to Wed dt.: Lizenz zum Heiraten	Bodo Wolf
2009	Night at the Museum: Battle of the Smithsonian dt.: Nachts im Museum 2	Peer Augustinski
2009	Old Dogs dt.: Old Dogs – Daddy oder Deal	Bodo Wolf
2011	Happy Feet Two dt.: Happy Feet 2	Ben Becker Rick Kavanian
2013	The Face of Love	Bodo Wolf
2013-14	The Crazy Ones, Feernsehreeg	Bodo Wolf

Utteken

Robin Williams weer en utermatig spoodrieken Schauspeler. För sien Warken weer he mehr as 120 mol för Filmpriesen vörslahn un mit 55 dorvun uttekent, as ünner annern mit:

• 1979: den Golden Globe in de Kategorie Best Serien-Hööftdorsteller – Kummedie oder Musical för Mork & Mindy
• 1988: den Oscar in de Kategorie Best Nevendorsteller för Good Will Hunting
• 1988: den Golden Globe in de Kategorie Best Hööftdorsteller – Kummedie oder Musical för Good Morning, Vietnam
• 1990: sien Steern op’n Walk of Fame
• 1992: den Golden Globe in de Kategorie Best Hööftdorsteller – Kummedie oder Musical för The Fisher King
• 1993: den Saturn-Pries in de Kategorie Best Nevendorsteller för Aladdin
• 1994: den Golden Globe in de Kategorie Best Hööftdorsteller – Kummedie oder Musical för Mrs. Doubtfire
• 2003: den Chainsaw Award in de Kategorie Best Dorsteller för One Hour Photo
• 2003: den Saturn-Pries in de Kategorie Best Hööftdorsteller för One Hour Photo
• 2005: den Cecil B. DeMille Award
• 2007: den Peter J. Owens Award

Butendem is na em (12820) Robinwilliams, en Asteroid ut’n Hööftgördel, nöömt worrn.

Literatur

• Meinolf Zurhorst: Robin Williams. Der ernsthafte Komödiant. Heyne-Filmbibliothek (Band 208). Heyne, München 1994, 214 S., ISBN 3-453-08122-6.
• Nick Young: Robin Williams. Hollywoodstar mit Herz. Ein Cinema-Buch. Lübbe, Bergisch Gladbach 1992, 225 S., ISBN 3-404-61243-4.

Weblenken

Robin Williams. Mehr Biller, Videos oder Audiodateien to’t Thema gifft dat bi Wikimedia Commons.

• Robin Williams in de Internet Movie Database (engelsch)
• Literatur vun un över Robin Williams in’n Kataloog vun de Düütschen Natschonalbökeree