Mibau-Stema

Vun Wikipedia
De Steines 2008
De Splittnes 2008

De Mibau-Stema-Grupp is en Ünnernehmen ut Kumbarg. De Mibau Bostoffhannel is för den Hannel mit Bostoffen (Sand, Splitt, Schotter un Steen) tostännig un Stema Shipping för den Transport. De Bostoffen warrt as Rohstoff för de Beton- un Asphaltindustrie un as Bomaterial för den Stratenbo, Gleisbo un Waterbo bruukt. Dat Ünnernehmen is in ganz Noordeuropa rund üm de Noord- un Oostsee aktiv.

2006 hett dat Ünnernehmen bi üm un bi 350 Mitarbeiders 150 Milljonen Euro Ümsatz hatt.[1]

Dat Ünnernehmen bedrifft en Flott von söss egene Scheep, de to’n groten Deel op de Sietas-Warft in Neefeld boot worrn sünd. Dat Transportvolumen von de Flott bedriggt üm un bi 10 Milljonen Tunnen Steen in’t Johr.

De Geschäftsföhrer is Jos van der Meer.

Historie[ännern | Bornkood ännern]

De Naam Mibau steiht för Mineralien für die Bauindustrie. Hans-Jürgen Hartmann hett ok dat Ünnernehmen Elbe-Weser-Handelskontor grünnt, op dat Mibau-Stema mit trügggeiht.[1]

För 3,5 Milljonen D-Mark hett Hartmann in de Johren 1990 en Andeel an’n Suugbagger Baltic Kies köfft, de mit Kiesafbo-Rechten in de däänsche Oostsee verbunnen weer.[1]

1994 is op de Warft HDW-Nobiskrug för 25 Milljonen D-Mark de 81,6 m lange un 15 m brede Suugbagger Seekies boot worrn.[2] 2003 is dat Schipp in’n Irak verköfft worrn.

Dat Ünnernehmen Heidelberger Zement hett in de Johren 1990 Andelen von 50 % an Mibau övernahmen.

De Hannel un Verkoop von Sand, Kies, Splitt un Mineralgemisch bi Heidelberger Zement leeg bet 2001 bi verscheden Sellschoppen, de to’n 1. November 2001 bi de Mibau tohoopfaat worrn sünd. Mibau hett dorbi ünner annern den Verkoop von de Bostoffen ut de Sand- un Kieswarken in Mekelborg-Vörpommern övernahmen.

Dat Ünnernehmen Mibau-Stema harr 2001 de beiden Scheep Kari Arnhild un Stones. As Reederee för de beiden Scheep hett von 2001 af an de Reederee Frank Dahl in Cuxhoben fungeert. Mit’n 14. November 2006 hett denn aver Hartmann sülvs över de HJH Shipmanagement as Reeder fungeert.

Granodiorit-Steenbrook in Norwegen gröttsten Steenbrook in Noordeuropa bi Stavanger

Scheep[ännern | Bornkood ännern]

De Steines is 1978 op de Kalmar Varv in Sweden boot worrn un bi Hagland Shipping AS as Millenium N lopen. 2005 hett Mibau-Stema ehr köfft, 2010 is se wedder verköfft worrn.[3]

De Massengoodfrachter Splittnes is 1994 in Noorwegen boot un 2001 von Mibau-Stema köfft worrn. Toeerst is he bi Mibau-Stema noch ünner’n Naam Kari Arnhild lopen, hett denn aver den ne’en Naam Splittnes kregen. 2006 is dat Schipp op de Noorderwarft ümboot un dorbi üm 18,2 m verlängert worrn.[3]

De dree Scheep Stones, Kvitnes un Sandnes (ut de Johren 2001 un 2005) sünd Sülvslöschers un Bulkcarriers von’n Typ Sietas Typ 167 (166,7 m lang, 24,5 m breed) mit en Ruum von 20.046 m³. De Bopries leeg bi üm un bi 60 Millionen D-Mark.[4]

De Stones is verköfft worrn un hett 2015 den ne’en Naam Donnacona kregen.

De Rocknes kentert vör de Küst von Noorwegen

De Kvitnes is 2003 as Rockdumper ümboot worrn un hett den ne’en Naam Rocknes kregen. Se weer an dat Ünnernehmen Van Oord verchartert, as se an’n 19. Januar 2004 in’n Süden von Bargen vör Noorwegen kentert is. Dorbi sünd 18 von de 30 Mann Kru doodbleven.

De dree Scheep Bulknes, Beltnes un Fitnes (ut de Johren 2009 un 2010) sünd Sülvslöschers un Bulkcarriers von’n Typ Sietas Typ 177 (175,6 m lang, 26 m breed) mit en Ruum von 26.042 m³.

Nadem to’n 1. Januar 2015 hartere Regeln fastleggt worrn sünd, dat in de Sulphur Emission Control Area in de Noordsee blots noch Drievstoff mit maximal 0,1 % Swevel verbrennt warrn dröff, hebbt de söss Scheep 2015/2016 all op de Pella-Sietas-Warft en PureSOx-Scrubber von Alfa Laval inboot kregen, de den Swevel ut dat Afgas rutwascht.

Footnoten[ännern | Bornkood ännern]

  1. a b c Hans-Jürgen Hartmann: ...überall auf der Welt erreichbar, Niederelbe-Zeitung an’n 5. Januar 2006
  2. Schiff&Hafen 3/1994
  3. a b Norderwerft verlängert im Juni "Splittnes", Schiff&Hafen an’n 7. Februar 2005
  4. Geschichte der Reederei Frank Dahl, Cuxhaven, seit 1973

Weblenken[ännern | Bornkood ännern]

Mibau-Stema. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 46′ N, 9° 3′ O