Johannes Mellinger

Vun Wikipedia
Mellinger sien Koort von dat Förstendom Lümborg (1593)

Johannes Mellinger (* üm 1538 in Halle; † Anfang Mai 1603 in Celle) weer en düütschen Kartograaf un Dokter.

Mellinger is üm 1538 rüm as Söhn von Elisabeth († na 1572) un Hans Mellinger († vör 1557) boren.[1] In de Oorkunnen dükert Mellinger toeerst op, as he 1555 Student an de Universität Wittenbarg is. Dor hett he 1562 den Magister maakt un is denn na Halle trügggahn.

1567 hett Mellinger in Weimar dat Börgerrecht kregen un is an de Stadtschool in Weimar as Kanter anstellt worrn. 1568 is he denn al Kunrekter ween. He is bet Anfang 1569 in Weimar bleven un hett dor 1568 sien eerst groot kartograafsch Wark rutbröcht, en Koort von Döringen.

1569 hett Mellinger den Posten as Rekter an de Stadtschool in Jena övernahmen. Dor hett he sik ok an de Universität Jena inschreven un hett 1572 en Medizinstudium opnahmen. Dat Amt as Rekter hett he 1573 afgeven.

1577 hett Mellinger denn in Hilmssen arbeidt un is 1578 in Celle Lievdokter von Hertog Willem den Jüngern von Bruunswiek-Lümborg worrn. Dat Amt hett he na’n Dood von Gervasius Marstaller övernahmen, de vörher Perfesser för Medizin an de Universität Jena ween weer. 1579 hett Mellinger an de Universität Rostock sien Dokter in Medizin maakt. Na’n Dood von Hertog Willem 1592 weer Mellinger denn ok Lievdokter för Hertog Ernst II.

In Celle hett he ok wedder as Kartograaf arbeidt. He hett 1590 en Ämteratlas von dat Förstendom Lümborg tekent un 1592/1593 en Koort von dat Förstendom.

Mellinger hett 1564 Catharina Schneller (üm 1545–1604) freet. De beiden hebbt de Kinner Nicolaus (üm 1566–1629), Pastoor in Beedenbossel, Johannes (üm 1569–1633), Dokter in Hilmssen un Friedrich (üm 1580–1626), Pastoor in Didderse, Wittingen un Sülfeld, hatt.

Footnoten[ännern | Bornkood ännern]

  1. Johannes Mellinger in de Düütsche Biografie (hoochdüütsch)

Weblenken[ännern | Bornkood ännern]

Johannes Mellinger. Mehr Biller, Videos oder Audiodateien to’t Thema gifft dat bi Wikimedia Commons.
Mellinger sien Ämteratlas. Mehr Biller, Videos oder Audiodateien to’t Thema gifft dat bi Wikimedia Commons.