Hermann Rose (Politiker)

Vun Wikipedia

Hermann Rose (* 7. Mai 1879 in Lümborg; † 28. Januar 1943 in Göttingen) weer en düütschen Jurist, Verwaltungsbeamten un Politiker von de DVP.

Rose is 1879 in Lümborg boren. Na dat Abitur 1897 an dat Johanneum Lümborg hett he Juristeree an de Universitäten in Heidelberg, München un Göttingen studeert un dat Studium mit de twee juristischen Staatsexamens afslaten. Sien Referendariat hett he bi’n Magistraat in Stood un in Veern maakt. 1905 is he Regerungsassesser bi de Iesenbahndirekschoon in Berlin worrn. Nadem he 1907 an de Universität Würzburg sien Dokter maakt hett, is he Iesenbahndirekter in Halle worrn. 1909 güng he as Regerungsraad in dat prüüßsche Binnenministerium un weer dor för Wahnungsfragen tostännig. He is 1913 Gehemen Regerungsraad worrn. In dat sülve Johr gifft he aver denn sien Ministerialloopahn op un warrt Direkter von de Düütsche Volksversekerungs AG. 1914 bet 1918 is he Soldaat in’n Eersten Weltkrieg un warrt 1920 Riekskommissar for den Wedderpbo von de zerstörten Rebeden. 1918 hett he de DVP mit grünnt.

Von’n 12. Mai 1922 bet 15. März 1933 weer Rose as Nafolger von Hans Grashoff Regerungspräsident von’n Regerungsbezirk Stood. 1933 hett he op Druck von’n Gauleiter von’n Go Oost-Hannover, Otto Telschow, dat Amt afgeven un is mit 54 Johren ut’n Verwaltungsdeenst rut. He is in’n Mai 1933 na Göttingen tagen un to’n 1. Oktober 1933 offiziell in’n Rohstand versett worrn.

Rose weer von 1921 bet 1932 Maat von’n Prüüßschen Landdag.