Helmut Janßen

Helmut Janßen (* 29. November 1910 in Jever; † 20. Juli 1992) weer en düütschen Verwaltungsbeamten.

Janßen is 1910 as Söhn von en Schoolmeester in Jever boren. He hett 1929 dat Abitur an dat Mariengymnasium in Jever maakt un denn Juristeree an de Universitäten Jena un Göttingen studeert.

He weer Referendar bi de ollnbörgsche Justizverwaltung, hett dat twete Staatsexamen maakt un weer denn Assesser bi dat Landraadsamt von’n Landkreis Cloppenborg. An’n 1. Juli 1940 is he Regerungsraad worrn un is an’n sülven Dag as Soldaat för den Tweten Weltkrieg na de Wehrmacht inropen worrn. Na’n Krieg weer he bi de Kreisverwaltungen för de Kreise Ollnborg un Vechte. An’n 1. Oktober 1950 is he Kreisrechtsraad bi’n Landkreis Cloppenborg worrn.

Nadem sien Vörgänger Adolf Rinck doodbleven is, hett em de Kreisdag von’n Landkreis Rodenborg an’n 8. Juni 1951 as Böverkreisdirekter wählt. 1962 is he wedderwählt worrn. As 1974 de nächste Wahl anstünn, weer al afmaakt, dat de Landkreis an’n 1. August 1977 mit’n Landkreis Bremervöör to’n ne’en Landkreis Rodenborg tohoopgahn schull. Dorüm hett dat keen Wahl geven un sien Amtstied is verlängert worrn. Janßen is denn an’n 31. Dezember 1976 in Rohstand gahn.

Na em is de Helmut-Janßen-Straat in Rodenborg nöömt. He hett 1977 dat Bundsverdeenstkrüüz I. Klass kregen, 1980 dat Neddersassische Verdeenstkrüüz I. Klass un is 1980 ok Ehrenbörger von de Stadt Rodenborg worrn.

1953 weer Janßen Mitgrünner, Vörsitter un later Ehrenvörsitter von’n Heimatbund Rodenborg. Janßen weer 1964 Maat von’n Fachbiraad, 1975 Ehrenliddmaat un 1986 Viezpräsident von’n Neddersassischen Heimatbund. 1982 is he Vörsitter von’n Museumsverband för Neddersassen un Bremen worrn. He weer ok lang Maat von’n Vörstand von’n Landschopsverband Stood. He weer Vörsitter von’n Kreisverband Rodenborg bi dat Düütsche Rode Krüüz, Kuratoriumsliddmaat in’n Vereen Diakonissen-Mudderhuus un Tweten Vörsitter von’n Frömmenverkehrsvereen Rodenborg.

Literatur

• Günter Petschel: Helmut Janßen †. In: Rotenburger Schriften 77 (1992), S. 83-87