Gabriela Sabatini

Vun Wikipedia
Gabriela Sabatini mit ehrn Duft Bolero

Gabriela Sabatini (* 16. Mai 1970 in Buenos Aires) is en ehmolige argentinsche Profi-Tennisspelersche, de ok dör Optreden in Warf bekannt worrn is.

Levensloop[ännern | Bornkood ännern]

Anfang un 1980er Johren[ännern | Bornkood ännern]

Sabatini hett dat Tennisspelen in’t Öller vun 6 Johren anfungen. Twee Johren later hett se ehr eerst Turneer wunnen. 1983 is se mit 13 Johren de jüngste Winnersche vun’n traditschoonsrieken Orange Bowl för de ünner-18-Johrigen worrn. In de Folg hett Sabatini söss Grand-Slam-Titel bi de Junioren wunnen un is 1984 as beste Juniorenspelersche vun de helen Welt föhrt worrn.

Dat Johr dorop is se bit in’t Halffinale vun de French Open kamen un weer to de Tiet de jüngste, de dat fardig bröcht hett. Dor hett se gegen de lateren Winnersche Chris Evert verloren. Dat glieke Johr hett se in Tokio ok ehr eerst Turnier bi de Utwassenen wunnen. Facklüüd hebbt för Sabatini dormols en grote Loopbahn vörrutseggt.

Lange Tiet harrn de beiden Rivalen Chris Evert un Martina Navrátilová dat Tennis bi de Fronslüüd bestimmt, man dat wessel nu Enn vun de 1980er Johren, as dat Frons-Tennis nu mehr un mehr vun Steffi Graf prägt weer. Sabatini weer as de Konkurrenz hannelt, de mit Graf in de tokamen Tiet üm den eersten Platz in de Weltranglist kämpen schüll. Wohrhaftig schüll dat Duell twüschen de beiden to en Oort Klassiker warrn. 40 mol hebbt de beiden gegenenanner speelt, wo Graf 29 mol bi wunnen hett un Sabatini 11 mol.

De Argentinierin hett Steffi Graf faken dat Leven op’n Tennisplatz swoor maakt un mitünner seeg dat ok so ut, as künn se ehr bikamen, man bi de groten Turnieren hett Graf jümmers vörn legen un hett Sabatini dormit en spoodriekere Loopbahn in’n Weg stahn. Negen mol is se bi Grand-Slam-Turnieren gegen Graf utscheedt.Bit 1987 hett se gegen Graf nich een Match winnen kunnt, man dorna weer dat Sabatini, de Graf in ehr beste Tiet en poor vun ehr wenigen Nederlagen bibringen künn. 1990 hett se ehr fief mol slahn un weer en Tiet lang ehr grötteste Konkurrentin.

Dat eerste Grand-Slam-Endspeel int Enkelt hett Sabatini 1988 speelt. Se drööp bi de US Open op Graf, de in dat Johr al de dree annern Grand-Slam-Turnieren all wunnen harr. Dat Speel weer lang utgleken, man an’t Enn künn se nich gegen Graf an. Jüst so ok in’t Endspeel vun de Olympischen Spelen in Seoul. An’t Enn vun’t Johr hett Sabatini ehr eerste vun twee WTA-Tour Meesterschappen wunnen.

De beste Tiet[ännern | Bornkood ännern]

Den gröttsten Spood harr Sabatini in de Johren 1990 bit 1992. In disse Tiet hett se tosamen dörteihn Turnieren wunnen.

Üm de Vörherrschop vun Steffi Graf to överwinnen, füng Sabatini dormit an, ehr Speel ümtostellen. Dorto hett se sik mit Carlos Kiermayr eerst mol en ne’en Trainer söcht. As se 1990 in’t Finale vun de US Open wedder op de Düütsche drapen is, wies ehr nee Speel Spood un se künn dat Turnier winnen. Ok bi de WTA-Tour Meesterschoppen künn se Graf ünnerkriegen, verlör dat Endspeel aver denn gegen Monica Seles.

Ok 1991 güng goot an. In de eersten Johreshälft hett Sabatini fief Turnieren in een Reeg wunnen. In Florida, Miami un Amelia Island wunn se dorbi gegen Graf. In’t Endspeel vun Rom hett se denn ok de dormolige Weltranglisten-Eerste Monica Seles slahn, de to de Tiet jüst ehr beste Phaas harr. Ok in Wimbledon stünn Gabriela Sabatini wedder in’t Finale. Ofschoonst se in’n letzten Satz mehrmols to’n Winnen vun’n Satz opslahn de, ünnerleeg se opletzt doch wedder. In disse Tiet steeg Sabatini in de Weltranglist bit op den drüdden Platz un leeg för en korte Tiet blots wenige Punkten achter Graf un Seles. Ehr Spood schien 1992 wietertogahn, as se mit Sydney, de Pan Pacific Open, Hilton Head, Amelia Island un Rom wedder eenige Turnieren winnen künn. Denn aver is Sabatini inbroken.

Enn vun de Loopbahn[ännern | Bornkood ännern]

Na de fief wunnen Turnieren 1992 hett de Leistung vun Sabatini bannig nalaten. In de negenuntwintig Maanden künn se keen Turnier mehr winnen. 1994 harr se noch mol Spood un wunn to’n tweeten mol de WTA-Tour Meesterschoppen. Anfang 1995 seeg dat so ut, as künn se wedder an fröhere Tieten ansluten, as se dat Turnier vun Sydney gegen Lindsay Davenport winnen künn. Man, dat bleev dat letzte mol. Se dröp dorna noch tweemol op Graf, gegen de se aver nix mehr utrichten künn.

1996 keem dorto, dat se sik an’n Buukmuskel besehrt harr, so dat se eenige Maanden lang nich spelen künn. Se künn dordör an wichtige Turnieren nich deelnehmen un füll to’n eersten mol siet 1985 ut de Top Ten vun de Weltranglist. As se in’n Juli wedder torüch keem, künn se an de ollen Leistungen nich wedder anknütten. Ehr letzt Speel hett se in’n Oktober 1996 in Zürich maakt, as se gegen Jennifer Capriati verleren de. An’n 27. Oktober verklor se denn, dat se vun’t Profitennis torüchpedden wull. Se harr to de Tiet 27 Enkelt- un 12 Dubbel-Titel wunnen un tosamen mehr as acht Millionen US-Dollar an Priesgeller innahmen.

De Tiet na’t Tennis[ännern | Bornkood ännern]

As se ehr Tennisloopbahn an’n Nagel hungen harr, is Gabriela Sabatini en spoodrieke Ünnernehmersche worrn. Sabatini, de goot utsehen de, harr al mit 18 Johren, as se noch in’t Profitennis spelen de, ehrn Naam as Lizenz för den Ruchreeg an de düütsche Firma Mülhens (Kölnisch Wasser), in de Twüschentiet Wella/Cosmopolitan Cosmetics, vergeven. Al ehr eerst egen Parfum, Gabriela Sabatini, is en groten Spood worrn un tellt vundaag to de Klassiker. Se hett dormols den Grundsteen leggt för en internatschonale Parfummarke, de in de verleden Johren een Ruchreeg för Fronslüüd un een för Mannslüüd rutbröcht hett (Eau de Toilette, Wild Wind, Dévotion for men, Dévotion for women, Daylight, Private Edition, Temperamento),un siet 1989 mehr as 600 Millionen Euro Ümsatz maakt hett (Stand 2003). Ehr Oort, dat Parfum to vermarkten, hett ok bi annere Prominetenen-Parfummarken School maakt hat, as bi Priscilla Presley, Cindy Crawford un Naomi Campbell. Dat gifft ok en ne’e Rosentucht, de den Naam Gabriela Sabatini driggt.

De Tennisloopbahn in de Bilanz[ännern | Bornkood ännern]

Laat in de 1980er un in de 1990er Johren weer Sabatini een vun de besten Spelersches vun de Welt. Ehr Loopbahn güng vun 1985 bit 1996. Se hett sik in de Tiet ruchweg 10 Johr lang in de Top Ten hollen un stünn twüschen 1990 un 1994 föffteihn mol achterenanner bi Grand-Slam-Turnieren tomindst bit in’t Veerdelfinale. Ehr höchsten Platz 3 in de Weltranglist hett se eerstmols an’n 27. Februar 1989 instellt. as en Hööchpunkt vun ehr Loopbahn gellt de US Open vun 1990, as se to’n eersten mol ehr duersome Rivalin Steffi Graf schlahn hett.

Sabatini hett twee mol de WTA-Tour Meesterschoppen wunnen. Ünnern Streek stünn ehr Loopbahn in’n Schadden vun Steffi Graf, de den Froon-Tennis to ehr aktive Tiet klor beherrschen de. Mit Graf tosamen hett se aver ok Dubbel speelt. Tosamen hebbt se 1988 eenmol den Dubbel-Titel in Wimbledon hollt. Sabatini hett in ehr Loopbahn 8.785.850 US-Dollar an Priesgeller inspeelt. Bi de Olympischen Sommerspelen 1998 in Seoul hett se butendem de Sülvermedaille wunnen.

Grand-Slam-Resultaten[ännern | Bornkood ännern]

Enkelt[ännern | Bornkood ännern]

Turnier 1984 1985 1986 1987 1988 1989 1990 1991 1992 1993 1994 1995 1996 Wunnen
Australian Open - - - - - HF 3r VF HF HF HF 1r 4r 0
French Open - HF 4r HF HF 4r 4r HF HF VF 1r VF - 0
Wimbledon - 3r HF VF 4r 2r HF F HF VF 4r VF - 0
US Open 3r 1r 4r VF F HF S VF VF VF HF HF 3r 1

Dubbel[ännern | Bornkood ännern]

Turnier 1985 1986 1987 1988 1989 1990 1991 1992 1993 1994 1995 1996 Wunnen
Australian Open - - - - HF 2r AF - - - 2r VF 0
French Open 1r F F HF F - HF - - AF AF - 0
Wimbledon 2r - AF S VF VF - - - 1r HF - 1
US Open 1r HF HF HF HF AF - - - HF 2r HF 0

Weblenken[ännern | Bornkood ännern]