Gösta Hansson

Gösta Hansson (* 26. Februar 1898 in Annelund bi Landskrona in Sweden; † 23. Dezember 1979 in Bjärred, Sweden) weer en Gutsverwalter in Nückel bi Bremerhoben.

Läven

Gösta Hansson weer de Söhn vun Olov Hansson un sin Fro Kerstin. Born weer he op den Hoff vun sin Öllern in Annelund bi Landskrona. As he de högere Landweertschopschool in Svalöv (Sweden) afslaten harr, gung he na Däänmark. Acherna gung he torüch na Sweden. 1921 harr he Arbeit funn op dat Gut Heinrichslust bi Hogenselchow in Vörpommern. As Hugo Stinnes to Besöök dar weer, het he Gösta Hansson kennen lihrt. Stinnes het gau markt, de Hansson harr een ansleegschen Koop un geev em 1922 een Stell op sin Gut „Herrschaft Wurchow“ in Achterpommern. To düsset Gut hört noch veele annere Gutshööv to un dat Leid dor över harr een Direktor.

Stinnes harr ok een Gutshoff in Nückel un de Verwalter Erik Andersson, ok een Keerl ut Sweden, weer krank wuurn un so kriggt Hansson den Updrach in ’n Juni 1923 den Verwalter Andersson to vertreden. Dat harr he doon bet to’n November 1924. As Andersson an’n 11.Februar 1927 dotbleiven is, kreeg Hansson de Steed. Dat weer goot so, den nu weer he nich man blots de neege Verwalter, nee he harr ok een dralle Deern op Nückel kennenlihrt. In’n Juni 1928 heirad he Frieda Möller.

1928 harr Hansson dat Gut vun de Holtweertschop op de Landweertschop ümstellt. Hackfrucht, Koorn un Kantüffeln dat weer sien Opgaav un wo he besünners na kieken dä. He het avers ook neege Sacken inföhrt, wat nu ökoloogsch nöömt ward. Üm dat Unkruut to verhinnern plant he Hemp an. Hemp ward hooch un dat Unkruut kunn nich dar gegen an. An de Bööm hebt se Vagelkastens för de Spreen ophangen. De Spreen hebt de Plaag mit de Miegeemk un de Wischschnaken to’n Enn bröcht. För all dat is Hansson in de Zeitung vun den böversten Buerföhrer in düt Rebeet, Heusmann, lövt worrn.

1934 het Stinnes Hansson na Baukem inladen. Dor het he Hitler drapen un Stinnes het Hitler vun Hanssons gode Arbeit op Nückel vertellt. Dat blev nich ahn dat dar wat na kamen is. As Hansson weder in’t Huus weer, keem de Landweertschopschool un de Weertschapraatslaachsteed na Nückel. De heft den in Nückel 1935/1936 Koorn un Kantüffeln dörchprobert. Man nich nur mit de Landweertschop heft se sick befaten, ook mit de Veehtucht. De Bull „Buber“ het 1935 den Pries 1A bi de Stierkörung kregen. Bi de Keuh hebt se de Melk- un de Fleeschleistung höger setten kunnt.

All dat het Hansson dor vun afholen torüch na Sweden to gahn. In Sweden har he wohl keen so’n Stell kreegen un buten op’n Land kreeg he ja ok nich so veel mit wat in’n Wersermünn los weer. He wer en Keerl ut dat neutrale Sweden. De niege Regeren in Berlin het em lövt un holt de Hannen över em. Wat wöll he mehr? So het he eenfack de Ogen dicht maakt.

Sien Lüüd op’n Gut stunn achter em und as de Krieg togang käm, het Hansson uppasst, dat sien Lüüd nicht to de Suldaten mussen. As de Krieg 1945 to Enn weer is de Konzern vun Stinnes uplöst wurn. Dat Gut kreeg nu de hannobersch Siedlungssellschop, de dat Gut Nückel updeelt het. Hansson mut nu mit ankieken, dat sien Levenswark to’n Düvel gung. Wat har he sik doch afmaracht üm allns op Schick to hebben un nu dat. 1958 har he de Opgaav den Bedrief uptolösen. As he dat kloor har, gung he 1960 na Bjärred in Sweden. Sin Fro un sin Gören weern all dor. In Bjärred is he an 23. Dezember 1979 dotbleiven.

Nückel

Gutshoff
Gösta as Buer

Wat doröver schreven is

Peter Raap: Das untergegangene Dorf Nückel – Historische Gebäude wurden zu Feuerholz verarbeitet. Niederdeutsches Heimatblatt, Männer vom Morgenstern 764 (August 2013). PDF-Datei
Peter Raap: Ein Schwede als Verwalter auf Gut Nückel – Das Gut der Firma Stinnes unter der Leitung von Gösta Hansson. Niederdeutsches Heimatblatt, Männer vom Morgenstern 800 (August 2016). PDF-Datei

De Artikel „Gösta Hansson“ is een exklusiven Artikel up de Plattdüütsche Wikiepdia. In anner Spraakuutgaven is de nich to finnen.