Feodor Szerbakow

Feodor Szerbakow (Theodor Szerbakowski; * 20. Februar 1911 in Eckertsdorf in Oostprüßen; † 10. Februar 2009 in Seebargen) weer en düütschen Maler.

Szerbakow is 1911 as Söhn von en Buur in Eckertsdorf (Masuren) boren. Bet he 17 weer, is he op’n Hoff von de Öllern opwussen un hett dor in de Bueree hulpen. 1928 hett he siene Heimat verlaten un is na Stettin tagen. Bi en pommerschen Kunstmaler hett he de eersten Grundkenntnisse in Malen un Teken lehrt. 1930 güng he op de Kunsthoogschool Berlin. He hett dor Maleree bi de Perfessers Buchholz, Lange un Hentschke studeert. In Berlin hett he dat eerste Maal Warken von Otto Modersohn ut Hu’e kennenlehrt, de de Grünner von de Künstlerkolonie Worpsweed weer. 1933 keem Szerbakow mit siene Fro Frieda na Worpsweed. Modersohn is sien Vörbild un later sien Lehrer ween. De Ümgegend in dat Düvelsmoor, dat Moor un de Strööm, de Still un Eensamkeit von de Gegend hebbt em anspraken un dor hett he sik hentagen föhlt. In’n Tweten Weltkrieg is he na de Wehrmacht intagen worrn. Na’n Krieg hett he för en lange Tied de Maleree opgeven. He hett trüggtagen in Seebargen leevt un dor exootsche Blomen, Planten un Rhododendren-Büsch tücht. He weer en verseerten Botaniker. Eerst in de Johren 1970 hett he sik wedder de Maleree towennt.

Wark

Szerbakow sien Maalstil weer dull präägt von Otto Modersohn. Siene Landschopbiller wiest faken nevelige Moormotive un Sünnünnergäng, aver ok üppige Blomen-Stilllevens. Later hett he sik ok an’n Maalstil von Anton Burger orienteert.

Ehren

2001 hett de Künstlerkolonie Worpsweed to Szerbakow sien 90. Geboortsdag för ehren letzten olen Meester en grote Retrospektive brocht.

Literatur

• Kurt Pillnick: Feodor Szerbakow - Die Kunst bestimmt sein Leben., Großbuchbinderei Kuhlmann, Ollnborg 1991
• Feodor Szerbakow. Verlag Atelier im Bauernhaus, Hu’e, ISBN 3-88132-742-8

Weblenken

• Biller von Szerbakow (hoochdüütsch)
• Galerie Fündling, Biller von Szerbakow (hoochdüütsch)