Dubbelt Elektroneninfang

Vun Wikipedia

De dubbelte Elektroneninfang is en Mööglichkeid för den radioaktiven Verfall vun en Atomkarn. De dubbelte Elektroneninfang is blots för en Nuklid (A,Z) mööglich, wenn de Masse vun dat Dochternuklid (A, Z-2) lütter is. A steiht hier för de Nukleonentall un Z för de Atomtall.

Vörgang[ännern | Bornkood ännern]

Bi disse Verfallsoort, warrt ut de Elektronenhüll twee Elektronen vun twee Protonen ut’n Karn infungen. Dorbi entstaht twee ne’e Neutronen un twee Neutrinos warrt freesett. Dör dat Ümwanneln vun de Protonen in Neutronen blifft de Tall vun de Nukleonen (A) gliek, man de Tall vun de Protonen (Z) warrt üm 2 sieter. Dat heet, dat en anner’t Element entsteiht.

Bispeel:

Tomeist is disse Verfallsweg överdeckt vun annere Verfallsweeg, de wohrschienlicher sünd (to’n Bispeel de enkelte Elektroneninfang). In de Fäll aver, wo de annern Weeg verboden oder düchtig ünnerdrückt sünd, kann ok de dubbelte Elektroneninfang de Hööftverfallsoort wesen. Ünner de Isotopen, de in de Natur vörkamt, gifft dat 35, bi de de dubbelte Elektroneninfang vörkamen kann. Liekers künn de Vörgang eerst för korte Tiet in Experimenten nawiest warrn. Dat kummt dorvun, dat de Wohrschienlichkeit för en dubbelten Elektroneninfang gresig lütt is. Na de Theorie liggt de Halfweertstiet för dissen Verfallsweg bi mehr as 1020 Johren.

En tweeten Grund is, dat de Nawies blots över γ-Quanten oder Augerelektronen vörnahmen warrn kann, de ut de Atomhüll afstrahlt warrt. In dat Energierebeet (~1-10 keV) gifft dat aver en teemlich hoog Achtergrundruuschen, wat den Nawies för den dubbelten Elektroneninfang sworer maakt as den vun’n dubbelten Betaverfall.

Wenn de Massenünnerscheed twüschen Mudder- un Dochter-Atom mehr as twee Elektronenmassen (1,022 MeV) groot is, is de Energie, de bi den Vörgang freesett warrt, groot noog, dat de Elektroneninfang mit twee Positronen-Emisschonen mööglich warrt. De löppt gliektietig mit den dubbelten Infang af. De Proportschoon vun de Männichkeit vun beide Verfallsweeg hangt vun de Egenschoppen vun’n Atomkarn af. Wenn de Massenünnerscheed mehr as veer Elektronenmassen (2,044 MeV) bedriggt, warrt noch en drüdden Verfallsweg apen doon, neemlich de dubbelte Positronenverfall. Blots söss natürliche Nukliden künnt över all dree Weeg verfallen.

Dubbelt Elektroneninfang ahn Neutrinos[ännern | Bornkood ännern]

De beschrevene Vörgang mit dat Infangen vun twee Elektronen un de Emisschoon vun twee Neutrinos hett Verlööf na dat Standardmodell vun de Elementardeelkenphysik, vunwegen dat dorbi keen Sätz vun’t Wohren broken warrt – dat Wohren vun de Leptonentall inslaten.

Wenn aver de Leptonentall nich wohrt blifft, künn noch en wieteren Vörgang aflopen: De Energie, de freesett warrt, warrt binnen den Karn as Bremsstrahlen (Gammastrahlen) afgeven, ahn dat Neutrinos afstrahlt warrt. Disse Verfallsweg künn bit hüüt noch nich in Experimenten nawiest warrn un stünn ok gegen dat Standardmodell.