Anton Friedrich Christian von Wersebe

Vun Wikipedia

Anton Friedrich Christian von Wersebe (* 7. November 1784 in Bargen; † 6. Februar 1841 in Auerk) weer en düütschen Verwaltungsbeamten.

Von Wersebe is 1784 as öllsten Söhn von Charlotte Gerdrut, borene von Marschalck, un den Amtsvaagd Christoph Heinrich von Wersebe in Bargen boren.[1] In’n Mai 1802 hett he anfungen, an de Universität Göttingen Juristeree to studeren.[1] Na dat Studium is he toeerst in’n bruunswiek-lümbörgschen (hannöverschen) Staatsdeenst gahn. He is 1805 Auditer bi dat Amt Gifhorn worrn.[2] 1808 is he in’n ollnbörgschen Staatsdeenst wesselt un 1811 Kamerassesser worrn.[2] An dat Enn von de Franzosentied is he 1813 wedder in hannöverschen Staatsdeenst gahn un weer denn Drost von dat Amt Gifhorn.[2] Von 1814 bet 1816 weer he Drost von dat Amt Reten.[1]

Von 1816 bet 1823 weer he denn Drost von dat Amt Oold- un Neeklooster in Buxthu.[1] As dat Amt 1823 Deel von dat Amt Harsfeld worrn is, hett he dor den Posten as Drost övernahmen un is dat bet 1838 bleven.[1] In dat Johr is Landdrost Georg Oehlrich ut de Landdrostie Auerk versett worrn un von Wersebe is an’n 15. November to sien Nafolger ernannt worrn.[1] Dat is he bet to sien Dood 1841 bleven.[1] Sien Nafolger weer Carl Detlev Marschalck von Bachtenbrock.

Von Wersebe weer verheiraadt mit Friederike von Drieberg (11. Oktober 1785-1812).[1] De beiden harrn den Söhn Ernst von Wersebe.[1]

Footnoten[ännern | Bornkood ännern]

  1. a b c d e f g h i Oostfreesch Landschap: Anton Friedrich Christian von WERSEBE.
  2. a b c Ludwig Starklof: Ludwig Starklof, 1789-1850: Erinnerungen. Theater, Erlebnisse, Reisen. 1986, Sied 200