Tatoeba

Tatoeba is en Websteed, de Översetten von Sätz sammelt. En Oort Wöörbook för ganze Sätz. De Sätz staht ünner de Creative-Commons-Lizenz CC-BY, dat heet, dat elkeen de Sätz free bruken kann, solang he de Naams von de Autorn nöömt. De Naam kummt von dat japaansche Woord för „to’n Bispeel“ (例えば　tatoeba). De Websteed schall vör allen en Hülp wesen för Lüüd, de Spraken lehrt oder sik för Spraken intresseert un Bispeelsätz för disse Lüüd levern.

En vereenfacht Diagramm von de Datenstruktur

Opstellt un utdacht hett sik dat Trang Ho. De Start weer Perfesser Yasuhito Tanaka sien Tanaka-Korpus mit japaansche Sätz un jemehr engelsch Översetten. De Websteed löppt op Servers von’t franzöösch Afdeel von de Free Software Foundation. De Websteed is in 15 Spraken översett un hett Sätz in 94 Spraken sammelt. Üm un bi 10.000 Sätz hebbt ok Toonopnahmen.

Elk Satz is en Knütten in Tatoeba sien Datenstruktur. De Knütten sünd ünnerenanner lenkt. Wenn to’n Bispeel en engelschen Satz eenmal op Plattdüütsch översett is un eenmal op Quechua, denn kriggt een bi’n plattdüütschen Satz ok de Översetten op Quechua to sehn. Op disse Wies warrt ok Spraken verbunnen, bi de dat normalerwies swoor is, Wöörböker oder Översetten to finnen.

Weblenken

• Tatoeba sien Websteed (plattdüütsch)