Willy Klenck
Willy Klenck (* 29. September 1890 in Mulsen; † 31. Mai 1959 in Nindörp) weer en düütschen Schoolmeester, Raßenforscher un Heimatkundler.
Klenck is 1890 in Mulsen boren un weer von 1911 af an Schoolmeester in Nindörp. 1920 hett he den Vörsitt in’n Schoolmeestervereen von’n Kreis Neehuus övernahmen un is dat bet 1933 bleven. In de Tied weer he ok Afornten in’n Kreisdag.
Dör Kuntakt mit Walter Scheidt hett Klenck 1923 anfungen, sik mit Raßenkunn to beschäftigen un hett ok anatomische Meetregen in de Ümgegend von Loomst maakt. 1924 is he Kulturpleger in’n Kreis Neehuus worrn.
1934 is he Mitarbeider an dat Raßenbioloogsche Institut an de Universität Hamborg worrn. 1938 hett he as Schoolmeester ophöört un weer denn Mitarbeider von’n Natschonalsozialistischen Schoolmeesterbund. He weer dor vör allen togang mit ole Karkenböker, Ünnerlagen von de Standsämter etc., de för de Raßenkunn utweert warrn schullen.
In’n Juli 1943 is he Baas von dat raßenpolietsche Amt Oost-Hannober worrn un 1944 Baas von de Forschungsstelle „Rasse und Raum“ in’n Gau Oost-Hannober in Lümborg.
In’n Mai 1945 hebbt em de Briten as een von de hogen Lüüd in de Gau-Föhrerschop fastnahmen. 1947 hebbt se em denn aver wedder verlöövt, as Schoolmeester in Mittelsnohn to arbeiden. Blangenbi hett he denn vör allen över de Geschicht vun siene negere Heimat schreven un hett vele Bidrääg to de Nedderdüütsche Heimatbläder hatt.
He hett 1956 dat Bundsverdeenstkrüüz för sien Arbeiden to de Heimatkunn kregen un in Loomst hett de Willi-Klenck-Weg sien Naam na em kregen.
He is 1959 doodbleven un liggt op’n Karkhoff von Nindörp begraven.
Warken
[ännern | Bornkood ännern]- Vorgeschichtliche Stätten in der Börde Lamstedt In: Männer vom Morgenstern, Nr. 23, Jahr 1926/28
- Rassenkundliche Erhebungen in der Börde Lamstedt Archiv Stader, N.F.H., Nr. 24; 1934
- Bevölkerungsgenealogie Aufgaben der Familienkunde im Dritten Reich In: Praktikum für Familienforscher, Heft 27, Degener, Leipzig, Jahr 1934
- Hin zur Volksgenealogie In: Reichszeitung d. deutschen Erzieher. Nationalsozialistische Lehrerzeitung, Jahr 1937
- Der Stand der Volkssippenforschung im Gau Ost-Hannover In: 'Nationalsozialistische Erziehung', Hrsg.: Gauwaltung Ost-Hannover des Nationalsozialistischen Lehrerbundes, Nr. 5, 1939
- Niedersächsische Bauern im Gau Ost-Hannover I-IV In: Volk und Rasse, Jg. 17, Jahr 1942
- Heimatkunde des ehemaligen Kreises Neuhaus an der Oste. Pockwitz, 1957
- Das Dorfbuch von Mulsum im Lande Wursten, Kreis Wesermünde in Niedersachsen. Frankfort 1959