Frauenarzt (Rapper)
„Frauenarzt“ wiest op düsse Siet. Dat Woort hett noch annere Bedüden: kiek dorför ünner Froondokter.
Frauenarzt (an un for sik Vincenco de Marcos; * 18. Oktober 1978) is de Künstlernaam vun en Underground Rapper ut Berlin-Tempelhof. He is ok bekannt unner de Ökelnaams „DJ Kologe“, „MC Digital F“, „Arzt“, „Gyniko“ un „Günther“. Düsse Naams hefft meist wat to doon mit dat Woort „Gynäkologe“, wat ja de mediziensche Naam för Froondokter is. He is bekannt as en Vertreder vun den Miami Bass mit (hooch-)düütsche Texten. Veel vun siene Tracks klingt na 80er-Johren-Electro- Musik mit dröge TR-808-Beats. Bi siene Uptreed is he baven alle Maten unnerwegens up de Böhn. Tomeist sünd dor ok Deerns mit bi, de wenig anhefft un danzen doot. Faken tritt he up tohopen mit Mr. Long un DJ Manny Marc.
An'n 19. Juni 2007 is to'n eersten Mol en Videoclip vun Frauenarzt in de Hip-Hop-Sendung MTV Urban wiest wurrn. Dat Video to den Song Brennt den Club ab weer an'n sülbigen Dag ok in de Musiksendung Total Request Live to sehn. Dor köönt de Tokiekers Clips wählen, de se unbedingt ankieken wüllt. Dat Video is glieks Platz 1 bi TRL Most Wanted wurrn. Dat Leed kümmt vun dat Album Dr. Sex.
