Travemünn

Travemünn oder Traavmünn is en Stadtdeel vun Lübeck in Sleswig-Holsteen, de direkt an de Münn’ vun de Traav in de Lübecker Bucht liggt. To de Stadtdeel in’ politischen Sinn höört neben de Stadtbezirk Old-Travemünn/Rönnau, de in’ Spraakgebruuk faken mit Travemünn glieksett wurrd, ok de Stadtbezirke Priwall, Brodten, Teutendörp un Ivendörp. Brodten, Teutendörp un Ivendörp sünd lütt Dörper. Teutendörp is eerst 1934 eingemeend wurrn.

Geographie

Lübeck-Travemünn liggt ruch weg 20 Kilometer vun dat Stadtzentrum Lübeck af. De gröttste Deel vun de Stadtdeel liggt westlich vun de Traav. De an de Münn’ in de Oostsee liggend Halfeiland Priwall up dat Oostöver höört ok to Travemünn.

Dat Rebeet vun de Stadtdeel is 41,3 Quadratkilometer groot. 2003 leevten 13.786 Inwahner in Travemünn, also 334 Inwahner je Quadratkilometer. De meesten Bewahner leven in de Stadtbezirke Old-Travemünn/Rönnau. In de dree anner Dörper leevt blots tüschen 100 un 300 Inwahner. De Inwahnertall vun Travemünn hett tüschen 1993 un 2003 düütlich tonommen, in Lübeck hett se dorgegen afnommen.

Historie

Travemünn wurr 1187 grünnd. Mit de Rieksfreeheitsbreef van 1226 hett sück de Stadt Lübeck aber all vun Kaiser Friedrich II. de entscheidenden Rechte an Travemünn tosekern laten. Domols keem de Priwall to Travemünn. 1329 gung Travemünn endgültig in de Besitt vun de Stadt Lübeck över. Travemünn weer siet de Tieden vun Heinrich de Lööw stark befestigt, de Befestigungen sünd aber 1807 slepen wurrn. 1872 is Travemünn dör dat Oostseehoochwater stark beschädigt wurrn, tallriek Hüüs sünd dorbi verlustig gahn. Hüdtodag kann man nah Spuren vun disse Floot erkennen. 1913 is Travemünn nah Lübeck ingemeend wurrn.

Literatur

Thorsten Albrecht: Travemünde. (Kleine Hefte zur Stadtgeschichte, hrsg. vom Archiv der Hansestadt Lübeck, Heft 19) Lübeck 2005. ISBN 3795031184

Weblenken

Travemünn. Mehr Biller, Videos oder Audiodateien to’t Thema gifft dat bi Wikimedia Commons.

Websteed vun dat Oostseeheilbad Travemünn (hoochdüütsch)
Stadtteilprofil 2003 (statistisch Angaben to all Stadtdeelen un -bezirke) (hoochdüütsch)