Swienegripp 2009

Koloreert Bild vun en paar Influenza-A/H1N1-Viren (Born: CDC)

Swienegripp 2009 is de Naam vun en Gripp, de vun en Virus tostanne bröcht warrt, de in dat Johr 2009 to’n eersten mol upspöört wurrn is. Dor hannelt sik dat üm den Influenzavirus-Unnertyp Influenza-A-Virus H1N1 bi. Mit düssen Virus hefft sik unbannig veel Lüde över de ganze Eer hen ansteken. Düsse Gripp hett ok den Naam „Nee Gripp“ afkregen. De Virus-Unnertyp is Midden April 2009 bi twee Kranken funnen wurrn, de an’t Enne vun’n März in de USA krank wurrn weern un de sunst nix mit’nanner to kriegen harrt hefft. As denn wieter söcht wurrn is, is rutkamen, datt en ganzen Bulten vun so’n Süken in Mexiko to finnen weern un datt de Viren över de Grenzen vun dat Land hen rutsleept wurrn weern.

An’t Enn vun ’n April hett de Organisatschoon vun de Weltgesundheit (WHO) vör en Pandämie wohrschaut un seggt, nu weer de Süke dor bi, sik över de ganze Welt hen ut to breden. Anfang Juni 2009 is wohrschaut wurrn, dat weer nu hööchste Gefohr.

Al in de Midden vun’n Mai hett de WHO denn avers kunnig maakt, de Sake mit de Gefohr möss noch mol överdacht weern, vunwegen dat de H1N1-Virus man doch nich so’n Quaat anstellen dö, as se dat eerstto dacht harrn.

Dat so unbannig veel Lüde sik mit düsse Gripp befaten döen un dor bange vör weern un ok, dat över de ganze Eer hen so unbannig veel gegen düsse Gripp unnernahmen wurrn is, dat liggt ok dor an, dat en annern H1N1-Unnertyp 1919/20 de „Spaansche Gripp“ utlööst harr. Dormols sünd dor bi 50 Mio. Minschen bi to Dode kamen. Nu is dat avers so, dat bi de Grippen, de jedet Johr över de Eer hengaht, jummers ok H1N1-Unnertypen mit bi sünd.

Kiek ok bi

• Swienegripp