Salvador Dalí
Salvador Felipe Jacinto Dalí y Domenech (* 11. Mai 1904 in Figueras bi Gerona, Katalonien; † 23. Januar 1989) weer en spaanschen Maler, Böhnenbildner, Schriever un Schauspeler.
Dalí is een vun de beröhmtesten spaanschen Malers in dat verleden Jahrhunnert. 1927 keem he na Paris un sloot sik dar de Surrealisten an. So as disse modernen Maler fung he ok an, Saken totaal verdreiht to malen. Man kann in siene Biller woll Gegenstännen sehn, aver se hefft nix mehr mit de Würklichkeit to doon, sünd verbagen, verkehrt tosamenstellt un mit verrückte Ideen utstaffeert. 1931 maal he de "Weken Klocken", de he de Camemberts vun Ruum un Tiet nööm, aver wat he darmit utseggen wull, dat weet nüms so recht. Ok de "Brennen Giraff", ene Froonsfigur mit Schuufladen in ehren Liev is so'n Bispill vun siene Kunst.
De Surrealisten sloten em 1938 ut ehren Kring ut, wiel he dat Gedankengoot vun de Nationalsozialisten övernehm. Na en Upholen in de USA, keem he 1948 na Spanien trüch. Sietdem wahn he in Cadaques an de Costa Brava. Dat Landhuus, wo he in wahnt hett, harr he to ene verrückte Borg umboot. Up dat Dack hett he grote överdimensionale Eier sett, de vun wieten al to sehn sünd.