SAO-Kataloog
De SAO-Kataloog (Smithsonian Astrophysical Observatory Star Catalog) is en astronoomschen Steernkataloog vun’t Smithsonian Astrophysical Observatory.
Opstellt weer de Kataloog üm 1966 rüm för’t astrometrische Utmeten vun Fotoplaten un för de Satellitengeodäsie. He bargt 259.000 Steerns in de Standard-Epoch 1950.0 mit schienbore Helligkeiten rünner bit 9m. Tohopenstellt weer de SAO-Kataloog ut de besten Borns, de dat to de Tiet geven hett, so as de AGK1- un AGK2-Katalogen, FK4, Cape Zone oder de General Catalogue (GC). An’n Noordhimmel wiest he en Nauigkeit vun ruchweg 0,5″ op, in’n Süden is he ’n beten wat slechter.
De Kataloog besteiht ut 4 Bännen, de 152 Steernkorten bargt. Disse Korten wiest den vullstännigen Himmel in Delen vun 20°x20°. In de neesten Utgaav is de Epoch vun de Positschonen J2000.0. Al siet sien eersten Utgaav warrt in’n SAO-Kataloog ok de Tallen ut de HD- un BD-Katalogen angeven, as ok de Egenbewegen vun all Steerns. Dordör kann de Kataloog nich blots för Astrometrie un Geodäsie bruukt warrn, man ok för annere Saken as to’n Bispeel Stellarstatistik torüch bit in’t 19. Johrhunnert.
De Beteken in’n SAO-Kataloog besteiht ut de Bookstavenreeg SAO un en Tall, de in achteihn 10°-Bänner towiest warrt. Binnen een Band sünd de Steerns na jemehr Rektaszension ordent.