Plattmakers (Websteed)

Logo von Plattmakers.de

Bild von en Bispeel-Indrag bi Plattmakers (to dat Woord Schruuv)

Plattmakers is en Websteed mit en plattdüütsch Wöörbook un ünner den Naam Plattmakers Black ene Literaturdatenbank in ’t Internett. Dat Wöörbook hett Stand 2026 22.000 Indrääg.

Plattmakers Wöörbook

Tohoopstellt worrn is de Websteed 2009.

De grote Ünnerscheed to annere Wöörböker is de, dat de Wöör nich as utschrevene Wöör spiekert warrt. De Indrag warrt in en besünnere Schrievwies opschreven, jüst so as dat Woord in de öllste Form heten hett noch vör de ooldsassische Tied (so üm un bi dat Johr 700). Disse Schrievwies warrt denn ümwannelt in de moderne Schrievwies, indem naenanner all de Luudwannels sied de ole Tied op dat Woord anwennt warrt. Op disse Wies warrt de moderne Form von dat Woord konstrueert. Allens tohoop deelt de Websteed Plattdüütschland in 128 Dialektrebeden in. De Websteed is opstunns in Plattdüütsch, Hoochdüütsch, Nedderlandsch un Engelsch vörhannen un büddt blangen de Plattdüütsch verkloorten Wöör ok Översetten op Hoochdüütsch, Nedderlandsch un Engelsch an.

An’n 15. Februar 2021 is dat Wöörbook in en nee överarbeidt Form online gahn. Ünner annern sünd Spraakopnahmen, Riemwöör un Angaven to verwandte Wöör as ne’e Funschonen tokamen.

Plattmakers Black

Plattmakers Black is en Literaturdatenbank , de de kumplette plattdüütsche Literatur vun’t 15. johrhunnert bet in de Buried ümfaten schall. Blangen Böker ümfaat de Datenbank ok vele CDs, Schallplaten, Kassetten, Theaterstücken, eBooks un annere Medien. De Datenbank ümfaat op de enen Sied rund 90% Warken op Plattdüütsch, op de annern Sied Warken över Plattdüütsch, de in annern Spraken schreven wurrn. Dorto wiest Plattmakers Black ok biograafasche Informatschonen, Lebensdaten un Bibliografien to Schrievers, de op oder över Plattdüütsch schreven hebbt. De Schrievers sünd mit eine Koort verknütt, so dat Schrievers ut ene bestimmte Region to finnen sünd.

Geograafsch ümfaat Plattmakers Black all Formen von dat Plattdüütsche von Däänmark bet in dat Döringsche Eiksfeld un na Noordhessen un von dat ole Oostpreußen un bet na Westfalen un bet in’n Oosten von Nedderland (Nedersaksisch in Grönnen, Drenthe, Overiessel un Gelderland). Also binnen dat hüdige Düütschland de Regionen Sleswig-Holsteen, Mekelborg-Vörpommern, Hamborg, Bremen, Neddersassen, Westfalen un den Noorden von Sassen-Anholt un Brannenborg. Ok de Dialekten op annere Kontinenten (so as Plautdietsch un Pomerano) tellt dor mit to. Buten blievt de Dialekten an’n Nedderrhien un in dat Bergsche Land.

To de Böker sünd Titel, Verlag, Schrievers, Biller von dat Cover un Siedentallen to finnen. Wo dat güng warrt ok de Infos wiest, de de Verlag sülvs to’n Inholt gifft. Vele Böker sünd na Themen un Regionen kategoriseert. Bi Warken, de in’n Hannel noch to kriegen sünd, warrt op de Webshops verwiest, so as Amazon un Plattschapp.de. En Koop-Söök, wiest bloots Böker wiest, de ok to kriegen in’n Bookhannel to kriegen sünd.

Weblenken

• Websteed Plattmakers.de (plattdüütsch)