Phimoos

Stieven Pint mit Phimoos: De Vörhuut lett sik nich över de Ekel trecken

En Phimoos oder Drange Vörhuut is en Krankheitsbild in de Urologie. Dorbi is de Vörhuut vun’n Pint so drang, dat se sik blots ünner Pien, mitünner ok gor nich mehr över de Ekel torüch trecken lett (as op dat Bild).

Bi neeboren Jungs is en Vörhuutverkleven (physioloogsche Phimoos) begäng. In de meisten Fäll löst sik dat aver bit to dat Schoolöller. Wenn de wieterhen bestahn blifft, kann se as primäre Phimoos Lasten maken. Dat ist aver ok mööglich, dat sik en Phimoos mit tonehmen Öller dör de nalaten Elastizität vun de Huut oder dör Narven vun Sehren oder Sweren nee billt (sekundäre Phimoos).

Utwirken

En Phimoos dör Verkleven vun de binneren Vörhuutandelen bi Kinner maakt normalerwies keen Lasten un löst sik vun sülvst bit to de Pubertät.

En Naklapp vun de drange Vörhuut kann dat Sammlen vun Smegma wesen, wat mit slechte Hygiene verbunnen is un fakene Sweren vun de Ekel na sik tehn kann. Bi sünners swore Fäll vun Phimoos kann ok dat Waterlaten hinnert wesen, vun wegen, dat de Urin dör de drange Vörhuutapen nich gau noog aflopen kann un sik denn ünner de Vörhuut opstaut. De Vörhuut bläht sik dorbi as’n Ballon op. En wietere möögliche Last mit de Phimoos kann ok Piengeföhl bi de Erekschoon wesen, wenn de Vörhuut bi’t Stievwarrn vun’n Pint nich noog nageven kann. In eenige Fäll kummt dat dör de drange Vörhuut to wedderhollte Sweren vun de Ekel un/oder vun de Vörhuut, de dordör Narven billn kann, wo de Drangheit noch duller dör warrt. Ut den Grund waarrt bi dat Vörkamen vun disse komplikatschoon dorto raat, dat vun’n Kinnerdokter oder Urologen ünnersöken to laten.

Dat gifft ok Bedenken, dat dat Hygieneproblem mit dat Smegma, dat bi’n Phimoos nich wegmaakt warrn kann, to en grötter’t Risiko för Pint- oder Beermoderhalskrebs föhrt. Disse Vermoden warrt dör vele Ünnersöken stütt, man för en afsluten Oordeel is doröver noch nich nogg bekannt. Tomindst warrt en Zirkumzision nich as sinnvull ansehn, üm Vörpahl to slahn gegen de beiden Krebsoorden.

Paraphimoos

Phimoos bi torüchtogene Vöörhuut

As uroloogschen Nootfall speelt ok de Paraphimoos (ok Spaansch Kragen) en Rull. Wenn en to drange Vörhuut mit Gewalt över de Ekel togen warrt, kann dat dorbi to en Inklemmen vun de Ekel kamen, wo dat Aflopen vun’t Blood bi stört warrt. De Ekel un de inklemmte Vörhuut künnt dorbi bannig answellen, wat to’n een bannige Pien bedüüt un to’n annern dat noch sworer maakt, de Vörhuut wedder över de Ekel torüch to maken. Wenn sik dat Ödem nich dör Druck oder sacht Masseeren wedder wegmaken lett, mutt foorts en Dokter opsöcht warrn. De hett de Mööglichkeit, de Huut ünner öörtliche Benüsseln wedder in de normale Laag torüch to trecken. Wenn dat nich geiht kann he en operativen Snitt maken, üm dat en Schaden vun de Ekel dör Minnerdörblöden hinnert warrt. Wenn de Paraphimoos nich behannelt warrt, drauht dat bannig weh to doon un kann opletzt dör Gangränbilln bit hen to’n Verlust vun de Ekel föhren.

Behanneln

För de Behanneln vun de Phimoos staht na’n hüütigen Stand vun de Medizin verscheden Methoden to’n Behanneln praat. Wat dorvun beter is, hangt af vun de Utprägen vun de Phimoos. De hauptsächlichen Verfohren hebbt beid Vör- un Nadelen, wat faken to deelwies groten Striet twüschen de Lüüd föhrt, de för oder gegen de Zirkumzision sünd. All Naklapp, wat direkte medizinische as ok latere phsycholoogsche Folgen angeiht, sünd noch nich dör ümfaten Langtietstudien beleggt, so dat de Fraag noch nich afsluten klor is – afsehn vun Fäll, wo dat medizinisch kloor anwiest is.

Ahn Operatschoon

De Behanneln, de ahn Operatschoon utkummt, versöcht de Phimoos to dehnen oder dat Verkleven dör sacht Verschuven vun de Vörhuut to lösen, so wiet dat ahn Pien un Wedderstand mööglich is. Ünnerstütt warrt dat dör Opdrägen vun kortisonhollige Saalv. De Methood warrt över’n längere Tiet maakt un hett bi ordige Anwennen kuum Nevenwirken. Vör allen paseert dor nix bi, wat nich wedder torüchrullt warrn kann. Spood hett disse Anwennen na da aktuellen Leidlienen vun de Düütschen Sellschop för Urologie bi 50 % bit 75 % vun de Fäll, ne’ere Studien gaht sogor noch höger. Wenn de Methood nich helpt, kann en operative Behanneln maakt warrn. In Fäll vun symptomaatsche Phimosen, also Phimosen mit Lasten un drange Vörhuut mit Krankheiten as Naklapp as to’n Bispeel rezidiveeren Ekel- oder Harnweginfekschonen, warrt to de operativen Methood raat, ahn vörher de konservative Therapie to versöken.

Operativ Behanneln

En Operatschoon maakt de Phimoos mit grote Wohrschienlichkeit weg, bargt aver en risiko för Komplikatschonen (1,4 % bit 3 %) un Operatschoonstraumata. Dat gifft ünnescheedliche Ansichten över den richtigen Tietpunkt för en Operatschoon bi Kinner. Aktuell geiht de Tendenz mehr dorhen, dat een eerstmol töven deit, woans sik dat entwickelt. Vele Dokters raat opstunns eerst twüschen dat 8. un 10. Levensjohr to en Operatschoon, vun wegen dat sik bit to de Tiet vele Phimosen noch opwieten doot. De Tiet kann ok utnütt warrn, dat eerstmol mit de Behanneln ahn Operatschoon to versöken.

Generell künnt twee Oorden vun Operatschonen ünnerscheedt warrn. Bi de een warrt de Vörhuut vullstännig oder to’n Deel wegmaakt, as de Patient oder de Öllern dat hebben wüllt. Disse Behanneln warrt ok Besnieden oder Zirkumzision nöömt. Bi de annern warrt de Vörhuut so behollen, dat se kosmeetsch tofreden stellt (t. B. de „Welsh-Plastik“ oder de „Triple-Inzision“).

Afgrenzen

Verkleven

Uteneen hollen mutt een de Phimoos un de Präputialverkleven oder physioloogsche Phimoos. Disse natürliche Verkleven vun de Vörhuut mit de Ekel bi bi neeboren Jungs normal un löst sik meist jümmer vun sülvst in de eersten Johren. Blots bi ruchweg 20 % vun de söss Maanden ollen Jungs kann de Vörhuut kumplett torüchtogen warrn. Bi Eenjohrige to üm un bi 50 % un bi Dreejohrige to ruchweg 90 % mööglich. To de Tiet vun de Pubertät hett sik disse Verkleven bi 1–3 % noch nich löst.

Bi den Versöök, disse Verkleven vör de Tiet dör wedderhollt Torüchtrecken vun de Vörhuut oder dör Sonden to lösen, kann dat to Schrunnen un Fissuren kamen, de wedder en sekundäre Phimoos utlösen künnt.

Kort Vörhuutband (Frenulum breve)

En annern Grund vör Mucken bit Torüchtehn vun de Vörhuut kann blangen de Phimoos ok en kort Vörhuutband wesen. De Fackutdruck dorvör is Frenulum breve.

Weblenken

• AWMF: Aktuelle Düütsche Leidlienen to de Phimoos