Leggrohr

Vun Wikipedia
(wiederwiest vun Ovipositor)
Zur Navigation springen Zur Suche springen
Leggrohr an't Achterlief vun Gichtwöpsen (Gasteruption spec.)

Leggrohr, Leggbohrer oder Ovipositor is de Naam for en Apraat to'n Leggen vun Eier, so, as de bi allerhand Deerter bi Seken vorkamen deit. Ofschoonst düsse Struktur in ganz verscheden Deertergruppen vorkamen deit (u.a. bi de wecken Fischaarden),[1]is mit düssen Begreep sunnerlich de Leggapraat bi Insekten mit meent. Bruukt warrt he to'n Afleggen vun Eier in allerhand Unnergrünn.

Wie dat Leggrohr upboot is un wie dat funktschoneren deit[ännern | Bornkood ännern]

Gröön Haupeerd. Dat Leggrohr is düütlich to sehn.

Dat Leggrohr is tohopenwussen ut en Paar Anhangsels (Gonapophysen) an de Genitalsegmente (8. un 9. Segment vun't Achterlief). An'n Grund vun dat Leggrohr sitt dat Genitalgatt, wo de Eier rutkaamt, wenn se in dat Rohr rindrückt weert. [2]Bi de högern Insekten, as Goldpeer, Haupeer, Franjenflunken, Snavelinsekten un Huudflunken is dat Leggrohr wieter entwickelt, as u.a. bi de Felsenjumpers. Bi jem gifft dat noch en anner Paar Anhangsels. Dat billt, tohopen mit dat eerste Anhangselrohr, en Dubbelrohr. An den Grund vun de Anhangsels sitt ok Muskeln in. Dor könnt de Rohre mit bewegt weern un en Ei, wat dor insitten deit, warrt so na de Spitz vun dat Leggrohr drückt. [2]

Leggbohrers weert ok ummuddelt[ännern | Bornkood ännern]

Wöpsenstickel in't Rasterelektronenmikroskop

Bi de wecken Vertreders mank de Huudflunken, sunnerlich bi Immen un Wöpsen is ut den Leggbohrer en Giftstickel wurrn. Dör dat Rohr vun den vormoligen Leggbohrer flutt nu Gift ut en Giftblaas . Vunwegen, datt Giftstickels ummuddelte Leggrohre sünd, is dat klaar, datt se bi Heken fehlen doot.

Bi allerhand Insektengruppen kann dat Leggrohr verännert ween. Bi en Reeg vun Kortspriet-Haupeer sünd de Anhangsels (Gonapophysen) bannig vermickert. Ok bi de Echten Heemken sünd nich all Anhangsel vull utbillt. [2]

Annere Apraate to'n Eierleggen[ännern | Bornkood ännern]

Neven düssen Grundtypus vun en Leggrohr gifft dat bi de Insekten allerhand Apraate to'n Eierleggen, de wohrschienlich unafhängig vun de Lohrrohre tostanne kamen sünd. Swemmkävers hefft en Leggrohr, dat vun'e Funktschoon her ganz liek is, man dat hett sik ganz anners utspunnen. Ok bi allerhand Nettflunken un Kamelhalsflegen gifft dat Rohre an de Buuksiete vun de Genitalsegmente, de anners tostannkamen sünd. Bi tahlrieke Insektengruppen fehlt Leggbohrers ganz un dat Achterlief löppt spitz to, so datt dor Eier mit afleggt weern könnt.[2]

Belege[ännern | Bornkood ännern]

  1. Brohmer: Fauna von Deutschland. 2002
  2. a b c d Gerhard Seifert: Entomologisches Praktikum. Georg Thieme Verlag, Stuttgart 1975, ISBN 3-13-4550-02-4. S. 310–312

Weblenken[ännern | Bornkood ännern]

Commons-logo.svg Leggrohr. Mehr Biller, Videos oder Audiodateien to’t Thema gifft dat bi Wikimedia Commons.