Lastkraftwagen
En Lastkraftwagen, ok Lastwagen oder Laster nömmt, is en Kraftfohrtüüch mit en stieven Rahmen. Bruukt warrt dat sunnerlich for den Lastverkehr un höört dor also to de Nutzfohrtüge mit. Faken warrt dat Woort afkört mit LKW oder Lkw. Normolweg besteiht en Lastwagen ut en Dreeg-Stell, meist en Ledderrahmen, en passlichen Andriev, en Fohrerhuus un en Upbo to'n Dregen vun de Last oder Fracht.
Lastkraftfohrtüge weert in lichte, middelsware un sware Lasters unnerdeelt. Dor geiht dat na Gewicht bi. Man vun de Behörden warrt ok en Reege vun Fohrtügen as LKW ankeken, de up dat Stell vun en Pkw upboot sund, wenn se Lasten transporteern könnt. Bi bestimmte Lütttransporters un Kombinatschoonskraftwagens kann sogor een un datsülvige Fohrtüüchmodell mol as Pkw (Lüttbus) un mol as Lkw (Leverwagen) gellen. Annere Lüttlasters sund unner annern Kastenwagens, Hoochdackkombis un lüttje Pritschenwagens.