Juliers
De Juliers oder Iuliers (lat.: Iulii oder gens Iulia) sünd in dat ole Rom en Geslecht vun Patriziers ween. Se hefft en goden Naam harrt un stammen ut de Stadt Alba Longa her. Ehren Naam hefft se afleit‘ vun den sagenhaftigen Stammvader Iulus. He schall en Söhn vun den vermaarden trojaanschen Helden Aeneas ween hebben. De harr, so seggt de Mythos, na siene Flucht ut dat verneelte Troja, Rom siene Mudderstadt Alba Longa grünnt un weer ok ehrn eersten König wurrn. Aeneas siene Mudder schall Aphrodite (lat. Venus) ween hebben un so meenen de Juliers, datt se vun de Olympschen Gödder afstammen döen. Sunners Gaius Julius Caesar hett dor geern up henwiest, datt he vun en König un en Gott afstammen dö.[1]
Gens Iulia
[ännern | Bornkood ännern]De Gens Iulia weer nich riek, man se höör to de olen Familien vun Rom mit en bannig goden Naam, ofschoonst bloß en poor Mannslüde ut de Familie in de Politik vun den Staat wat reten harrn. In de fröhe Tied vun de Röömsche Republiek in dat 5. Johrhunnert v. Chr. gifft dat in de List vun de röömschen Kunseln fökener den Naam Iulius (Man ob de Listen echt sünd, dor hefft sik de Historikers over in’e Plünnen). 451 v. Chr. höör en Gaius Iulius Iullus to de Decemviri mit to, de den Staat vun’n Kopp up’e Been stellen schollen. In de Johrhunnerte dornah hett dat bloß twee Kunseln ut de Juliers ehre Familie geven (267 un 157 v. Chr.). Caesar sien Vadder is 92 v. Chr. Praetor wurrn. En poor Verwandte ut annere Twiege vun dat Geslecht hefft dat to’n Kunsel oder to‘n Censor brocht.
De bekannteste Mann mank all Juliers, un ehren gröttsten Söhn is Gaius Iulius Caesar. Mit sien Dood is de direkte (Vadder-) Lien vun de Juliers utstorven, just as bi allerhand annere unbannig ole Familien vun Adel in dat 1. Johrhunnert v. Chr. ok. De Grünn dorfor sünd nich bekannt, ofschoonst dor veel over spikeleert wurrn is.
Belege
[ännern | Bornkood ännern]- ↑ Vgl. Sueton, Kaiserbiographien, Caesar, wo Caesar in de Anspraak an dat Graff vun siene Tante Julia seggt, datt de Iuliers vun Venus afstammt.
