Hafnarfjörður

Kark un Musikschool

Hafnarfjörður is ene Stadt op Iesland mit 21.942 Inwahners (Stand 1. Dezember 2004) op en Flach vun 17 km², de in’n Noorden an de Hööftstadt Reykjavík grenzt.

Historie

Hafnarfjörður warrt al in’t Landnámabók nöömt. In’t Middelöller hebbt sik de Englänners un de Kooplüüd vun de Hanse üm de Vörherrschaft in Hafnarfjörður streden. Ok de Dänen hebbt den Haven för In- un Utfohr bruukt. Vun’t Enn vun’t 19. Johrhunnert an weer de Fischeree de wichtigste Brangsch.

Kultur

In’e Stadt hebbt se vele lütte Bargen ut Lava, üm de de Hüüs rümboot sünd, ahn de Bargen antotasten. Dat is wegen de Alfen, de in disse Bargen wahnen schöölt, denn in Iesland is de Glöven an Alfen, Trollen un Ünnereerdsche noch stark un de schöölt nich stöört warrn.

In’t Zentrum liggt de Park Víðistaðatún, in den dat en Skulpturenpark mit Warken vun ieslandsche un internatschonale Künstlers gifft. In’n Park liggt ok de helle halvrunne Kark Víðistaðakirkja. Dat Wohrteken vun Hafnarfjörður, de Lüchttoorn, den se 1900 boot hebbt, steiht hüüt merrn in en Rebeet mit Wahnhüüs.

In’n Sommer gifft dat in’t Stadtzentrum un rund üm de Staffkark elk Johr en Wikingerfest.

Hafnarfjörður is de Heimatstadt vun’n Popsinger Björgvin Helgi Halldórsson un de Schrieversche Kristín Marja Baldursdóttir.

Hafnarfjörður is en Parnerstadt vun Cuxhoben.

Weertschop

Hafnarfjörður hett en groten Fischereehaven un ok wat an Industrie. Dat Aluminiumwark Straumsvík bringt 15 bet 20 Perzent vun de hele Industrie-Utfohr vun Iesland.

Sonstiges

Hafnarfjörður is in de Niege Hanse.

Weblenken

• Tourismusinformationen (hoochdüütsch)
• Websteed vun de Stadt (ieslandsch)