Verlag H. Lühr & Dircks

De H. Lühr & Dircks is en Verlag, de sien Sitt nu in Hamborg (Horborg) hett.

Grünnt worrn is de Verlag an’n 12. November 1856 in Garn vun Heinrich Lühr un Jacob Dircks. De Bedriev as Bookbinneree is toeerst nich genehmigt worrn un dat weer toeerst blot en Ladengeschäft för Böker, Poppeer un Geschenkartikels. Eerst 1864 weer dat sowied, dat de Arbeit as Verlag opnahmen warrn kunn. Ünner annern is dat Daagbladd Eiderstedter Nachrichten in’n Verlag rutkamen. De Verlag hett vör allen Böker to de Heimatgeschicht ut Eiderstedt, Noordfreesland un Sleswig-Holsteen rutbröcht. En wichtige Reeg weren de Plattdüütschen Volksböker. Later weren Jacob Dircks junior un denn sien Enkeldochter Ingeborg Dircks Baas vun’n Verlag. 100 Johr nadem he grünnt worrn weer, weer de Verlag kuum noch aktiv, se harrn sik nu vör allen wedder op den Bookhannel konzentreert. Sied 1963 weren Wilfried Martens un Gerhard Reimers de Besitters vun’n Verlag. Eerst 1975 hett dat en Neeanfang as Verlag geven, as Jürgen Erich Klotz den Laden övernahmen hett un dor mit na St. Peter-Ording gahn is. 1989 denn hett de Quickborn-Verlag den Verlag H. Lühr & Dircks övernahmen. De Verlag hett nu blot noch en lütt Programm.

Weblenken

• Websteed vun’n Quickborn-Verlag (hoochdüütsch)