Gerald Schwörk

Gerald Schwörk (* 28. Februar 1950 in Boek) is en Meckelborger Bildhauer, Maler un Muuskant.

Sein Leven

De Bildhauer, Maler un Muuskant Gerald Schwörk is een echten Meckelborger Jung. To Welt keem hei in Boek an de Oostsiet vun de Müritz. In Rechlin, nich wiet hen, is hei na de Realschool hengon un hett dor sien Afsluss maakt. Op de Schippswarft vun Rechlin hett hei Schippboer lihrt. As hei dormit dörch weer mutt hei to de Suldaten na Niebrannenborg un weer dor bi de Funkers. Achteran weer hei bi de Schipplantüchtenwark in Uekermünn. Dor hett hei in de mehrst Tiet as Slosser arbeid un de verscheeden Materalien, besünners Iesen oder Kopper, mit Füer tosamen maaken. Achterna is hei wedder turüch gahn to de Schippwarft Rechlin un de Baas vun’n Heetkraftwark un tostännig för de Plaanung un dat versorgen mit technisches Gas.

As de beiden düütschen Staaten wedder tohoop kamen sünd geiht’t dat böös hen un her bi em. To eerst wohr hei bi een Warkstä för Heetung vun Juul in Neestrelitz as Arbeider, dorna as Vörarbeider. Achterna geiht’t hei to Wilken in Ludorp as Baas för Böteree un Afwater. Un dorna bi de Deepboer vun Spitzke ut Schomborch. De weern ut Leer un harrn in Grootbeeren ehrn Hööftsitt. Do weer hei as Arbeider un Smitt, as Baggerfohrer un Motoorarbeider för Landrammen un laater as Baas. As lütt Jung hett hei op dat Ümslagpapeer ut’n Konsum mit Köhl un Bleesticken Biller maalt. Laterhen keem Water- un Öölfarv dar to. Ok harr hei mit’n Kopersticken Biller maalt un achteran mit een Lösen de Farv fas maakt. In de School harr sien Tekenliehrer sehn wat de Jung allens kunn, em hölpen un em männich gode Saken liehrt. Ok sien Musikliehrer harr sien Freid an em un wiest em dat Trumpeet spälen. Later hen hett hei dree Jahr Danzmusik maakt un ok in de Kapell von de Schippswarft Rechlin hett hei lang tiet Trumpeet un Flögelhuurn spält. Dat musizeren hett hei nienich opgeven un Freid doran fun’n. Mit Früünen spält hei hen un wenn. Un vundaag liehrt hei Deerns un Jungs woans spält warrt.

Dat Biller malen hett hei nich nalaten, aver hei harr wat neet funnen, Holt. In de Dreihermaschien geev hei dat Holt een anner Utsehn. Man dat weer jümmers noch glatt un schier, dar kunn doch mihr vun maken? Un so fung hei an in de runden Knüppels wat rin to snäden mit en Metz. Dat weer de Anfang von de Skulpturen. Nu arbeit hei mit Holt, Iesen, Steen un Kopper. Billers maalt hei nu nich mehr, aver sin Skulpturen kregen hen un wenn een Klacks Farv. Man so heel hett hei dat Malen nich verliehrnt. Sien wunnerbaren Plastiken höört to de „Folk art in Germany“ as man op Engelsch dar to seggt. Hei sülben nömmt dat realistisch, naturalistisch un beten abstrackt. Hei lett sik leiden von sin Kreativität de ut em rut will. Updräag mookt hei nich so giern, den dar kann hei sik nich goot inbringen.

Vun 2009 hett hei wesselnde Utstellungen, bi „Kunst Offen Mekelnborger Seenplatte“ un bi’n Tourismusvereen Röbel/Müritz; Rundschüün Fincken; Möhlenvereen Röbel, veel lüttje Utstellungen un Handwarkermarkten.^[1] An 21. Maimaand 2021 het dat Nordmagazin över Gerald Schwörk un över sin Warken vertellt.^[2]