Gary Becker

Gary Becker, 2008

Gary Stanley Becker (* 2. Dezember 1930 in Pottsville, Pennsylvania; † 3. Mai 2014 in Chicago, Illinois) weer en US-amerikaansch Ökonoom. He kreeg 1992 den Nobelpries för Wertschapswetenschapen „för sien Utdehnen vun de mikroökonomsche Theorie up en wieden Beriek vun minschlich Verhollen un minschlich Tosommenarbeit“.

Leven

Mit veer oder fiev Johren truck Becker vun Pottsville nah Brooklyn. In dat Öller vun 16 Johr fung sien Interesse för Mathematik an. Wiel he sien Vader immer de neeste Wertschapsnahrichten vörlesen muss, kreeg he ok Weeten in dissen Beriek, ok wenn he dor ehrder vun langwielt weer.

An de Princeton University belegg he tofällig en Kurs in Ökonomie un weer dorvan düchtig andahn, vör allen vun de mathematischen Tosommenhänge. Bald aber stell he för sück sülvst fast, dat de mathematischen Glieken de Probleme vun de Sellschopp nich wirklich dorstellen oder sogor lösen kunnen.

Becker hett Princeton 1951 mit en B.A. afslooten un is dornah an de University of Chicago wesselt. Dor hett he in dat glieker Johr in en Mikroökonomiekurs to’n eersten Mal Milton Friedman drapen. De hett sien Interesse för de Volkswertschapslehre weer ruthalt un nah sien eegen Utseggen hett Friedman sien wiedere Loopbahn präägt. 1955 hett Becker sien Doktertitel an de University of Chicago maakt. Van 1957 bit 1968 geev he Ünnerricht an de Columbia University, kehr dornah an de University of Chicago torüch, wo he Priestheorie ünnerrichten dee.

Becker hett twee Süsters un een Bröer. 1954 hett Becker sien eerste Fru heiraadt, de aber all 1970 storven is. Dat Paar harr twee Döchter. 1980 hett he sien tweet Fru Guity Nashat heiraadt

In’ Mai 2014 is Becker in dat Öller vun 83 Johren in Chicago storven.

Lehre

Becker weer en vun de eerst Ökonomen, de de Wertschapswetenschap up Rebeeden utdehnen dee, de traditschonell ehrder to de Soziologie hörrn, as to’n Bispeel Rassendiskrimineeren, Kriminalität, Organisatschoon vun de Familie un Drogenafhängigkeit. Man kennt hüm för sien Argumentatschoon, dat völ Formen vun dat minschlich Verhollen as ratschonaal un Ergevnis vun Nutzenmaximeeren verstahn wurrn können. Up de anner Siet wies Becker in sien Forschung up de Bedüüden vun tüschenminschlich oltruistischen Verbinnen hen. In de 1960er un 1970er Johren hett he, gemeensam mit Schrievers as Theodore William Schultz un Jacob Mincer, dat Konzept vun dat Humankapitals in de Wetenschap wedder inführt.

Becker wies in sien Arbeiten up den ökonoomschen Nutzen vun Kinner för hör Öllern hen. Vun Becker stammt ok dat Rotten-Kid-Theorem. Sien Theorien spelen ok to dat Verkloren vun Gebortenraten in de Demographie en Rull.

Nah dat Nobelprieskomitee kann man dat Wark vun Becker Wark in veer Rebeeden klassifizeeren:

• Humankapitalinvestment
• Verhollen vun de Familie (Huushollen), insbesünnere Opdeelen vun de Arbeit un Tietallokatschoon binnerhalv vun de Familie
• Kriminalität un Straaf
• Diskrimineeren in Arbeits- un Gödermärkten.

De methoodsch Ansatz vun Becker wurr in verscheeden wetenschaplich Disziplinen rezipeert; ut dissen Grund betekent hüm de de Ökonom Justin Wolfers in en Nahroop för de New York Times as „den wichtigsten Sozialwetenschapler vun de letzt fieftig Johr“ un „kreativsten Ökonomen in de Historie vun disse Wetenschap“.

Sonstiges

Becker kreeg 1967 de John Bates Clark Medal verleeht un weer Liddmaat vun de Mont Pelerin Society. Van 1985 bit 2004 schreev de sück as in' klassischen Sinn liberal betekende Becker, in' Wessel mit den ehrder linksliberalen Ökonomen Alan Blinder vun de Princeton University, en maandlich Kolumne in de Business Week. In' Dezember 2004 fung he en gemeensamen Weblog mit den Richter Richard Posner an.

2007 kreeg he vun Präsident George W. Bush de Presidential Medal of Freedom, neben de Golden Ehrenmedaille vun den Kongress de hööchste zivile Utteken vun de USA.

Warken

• Human Capital: A Theoretical and Empirical Analysis, with Special Reference to Education (1964)
• Crime and Punishment: An Economic Approach (1968), Journal of Political Economy, 76(2), S. 169-217.
• The Economics of Discrimination (1957, 1971 2. Aufl.)
• The Economic Approach to Human Behavior (1976)
• A Treatise on the Family (1981)
• Ökonomische Erklärung menschlichen Verhaltens (1993) ISBN 3161460464
• The Economics of Life (deutsch Die Ökonomik des Alltags) (1996)
• Familie, Gesellschaft und Politik - die ökonomische Perspektive (1996) ISBN 3-16-146361-7
• Social Economics: Market Behavior in a Social Environment (2001)

Literatur

• Ingo Pies un Martin Leschke (Hrsg.), Gary Beckers ökonomischer Imperialismus, Tübingen, 1998, J.C.B. Mohr (Paul Siebeck).
• Thomas Weiss, Ökonomische Bestimmungsgründe der Fertilität in westlichen Industrieländern. Materialien zur Bevölkerungswissenschaft, Herausgeber: Bundesinstitut für Bevölkerungsforschung, Wiesbaden, 1986. (Darstellung und Kritik des Beckerschen Ansatzes)

Weblenken

• DNB-Katalog
• Becker up de Sieden vun den Nobelpries (engelsch)
• Beckers Webpräsenz an de University of Chicago
• The Becker-Posner Blog Weblog vun Gary S. Becker un sien Früend Richard Posner (engelsch)
• Kumplett Vörlesen vun Becker to de Humankapitaltheorie an de University of Chicago, Fröhjohr 2010