Franka Potente

Franka Potente 2019

Franka Potente (* 22. Juli 1974 in Mönster in Nordrhien-Westfalen) is en düütsche Schauspelersche.

Leven un Loopbahn

Franka Potente is dat öllere vun twee Kinner. Ehr Öllern sünd en Lehrer un en Medizinisch-Technische Assistentin, bi de se in Dülmen opwassen is. Dor hett se dat Clemens-Brentano-Gymnasium besöcht, woneem se 1994 ehr Abitur maakt hett. Dat se en italienschen Nanaam hett, kummt dorvun, dat ehr Oorgrootvadder Sizilianer weer, de in’t 19. Johrnunnert na Düütschland kamen is. Na de School hett se in München en Utbilln as Schauspelersche an de Otto-Falckenberg-School anfungen, de se aver na twee Johren afbroken hett. Se güng denn na New York un hett dor en Kurs an’t Lee Strasberg Theatre and Film Institute besöcht. En Agentin hett ehr in en Bar in München opdeckt, wat ehr to ehr eerste Hööftrull in den Film Nach Fünf im Urwald verholpen hett. De franzöösche Speelbaas Henri Helman hett ehr 1997 denn för en Hööftrull in den Film Une vie pour une autre na Frankriek hollt.

Den Dörbrook för ehr Schauspeel-Loopbahn hett 1998 ehr Titelrull in den Film Lola rennt vun Tom Tykwer bröcht, de internatschonal Acht funnen hett. En wietere Tosamenarbeit mit Tykwer keem 2000 mit Der Krieger und die Kaiserin, de ok Spood harr. To disse Tiet weer se mit Tyker ok privat tosamen.

In de nafolgen Tiet hett se en poor Rullen in Hollywood-Filmen speelt, as to’n Bispeel 2001 in Blow mit Johnny Depp un 2002 in The Bourne Identity mit Matt Damon. Üm ehr Loopbahn in de USA beter vöranbringen to künnen, weer Potente na Los Angeles togen, man se weer mit de Gööd vun de Rullen, de ehr anboden weern, nich tofreden.

2004 keem se wedder torüch na Düütschland un töög na Berlin. Dat glieke Johr hett se sik mit Bela B. un de Grupp Die Ärzte för de Anti-Pelz-Kampagne vun de Deerschuulorganisatschoon PETA bedeeligt. In’n September 2005 is op Grundlaag vun ehrn Breefwessel mit den Kollegen Max Urlacher, de se wiel de Tiet in L.A. harr, en Book rutkamen ünner den Titel Los Angeles – Berlin. Ein Jahr.

Potente hett ok al mol as Speelbaas un as Dreihbookschrieversche arbeit. För den Kortfilm Der die Tollkirsche ausgräbt hett se binnen dree Daag en Dreihbook schreven, dat se later sülvst as Speelbaas ümsett hett. De 43 Minuuten lange Film wiest en kummediantische Leefgeschicht an’n Dag vun’n Wapenstillstand 1918, wobi de Vertellwies vun’t fröhe Stummfilmkino bruukt warrt. De Film weer 2006 op de Berlinale to’n eersten mol wiest.

In de US-amerikaanschen Feernsehreeg The Shield speelt se vun Mitt vun de sössten Staffel an en armeensche Mob-Dochter. Ok in de söten Staffel warrt se wedder mitspelen. In 2008 hett se in den Film Che – Guerilla vun Steven Soderbergh, in den dat üm dat Leven vun Ernesto Che Guevara geiht, de düütschstämmige Wedderstandskämpersche Tamara Bunke dorstellt. In dat glieke Johr stünn se vör de Kamera för de Feernseh-Adapschoon vun den Antikriegsroman Die Brücke vun Manfred Gregor. Dat is en Remake vun den spoodrieken Kinofilm Die Brücke ut dat Johr 1959.

In’n Mai 2009 hett se tosamen mit ehrn Personal Trainer Karsten Schellenberg ehr tweet Book mit den Titel Kick Ass – Das alternative Workoutpulizeert. Se sülvst seggt över dat Book, dat dat en Raatgever is för Lüüd, de smöökt, fuul sünd un ok geern mol in de Bar gaht.

Privat

Potente weer vun 1998 bit 2002 mit den düütschen Filmemaker Tom Tykwer tosamen un dorna tietwies mit den US-amerikaanschen Schauspeler Elijah Wood, mit den se ok tosamen en Film dreiht hett. To Tiet leevt se mit en US-amerikaanschen Gewarfsmann tohopen, mit den se siet 2008 verlööft is.

Filmografie (Utwahl)

Johr	Titel	Synchroonsnacker	Funkschoon
1995	Nach Fünf im Urwald	–	Dorsteller
1997	Coming In, Feernsehn	–	Dorsteller
1997	Une vie pour une autre, Feernsehn		Dorsteller
1997	Easy Day, Kortfilm		Dorsteller Musik
1997	Die drei Mädels von der Tankstelle, Feernsehn	–	Dorsteller
1998	Opernball, Feernsehn	–	Dorsteller
1998	Lola rennt		Dorsteller Musik
1998	¿Bin ich schön?		Dorsteller
1999	Downhill City		Dorsteller
1999	$chlaraffenland	–	Dorsteller
2000	Anatomie		Dorsteller
2000	Der Krieger und die Kaiserin		Dorsteller
2001	Blow	sülvst	Dorsteller
2002	The Bourne Identity dt.: Die Bourne Identität	sülvst	Dorsteller
2002	All I Want dt.: Try Seventeen	sülvst	Dorsteller
2003	I Love Your Work dt.: The Fan – Schatten des Ruhms	sülvst	Dorsteller
2003	Blueprint	sülvst	Dorsteller
2004	The Bourne Supremacy dt.: Die Bourne Verschwörung	sülvst	Dorsteller
2004	Creep	sülvst	Dorsteller
2006	Elementarteilchen		Dorsteller
2006	Der die Tollkirsche ausgräbt, Kortfilm	–	Dreihbook Speelbaas
2007	Romulus, My Father dt.: Unter der Sonne Australiens	sülvst	Dorsteller
2007	Eichmann	Nadine Heidenreich	Dorsteller
2007	The Shield, Feernsehfolgen dt.: The Shield – Gesetz der Gewalt	sülvst	Dorsteller
2008	Che: Part Two dt:Che – Guerilla	Tanja Geke	Dorsteller
2008	Die Brücke		Dorsteller
2010	Shanghai	Tanja Geke	Dorsteller
2011	Beate Uhse – Das Recht auf Liebe, Feernsehn	–	Dorsteller
2012-13	Copper, Feernsehreeg dt.: Copper – Justice is brutal	Tanja Geke	Dorsteller
2014	The Bridge, Feernsehreeg dt.: The Bridge – America	Claudia Gáldy	Dorsteller
2016	The Conjuring 2 dt.: Conjuring 2	Vera Teltz	Dorsteller
2017	Taboo, Feernsehreeg	Stephanie Kellner	Dorsteller
2017	Muse		Dorsteller

Utteken

Franka Potente is al för eenige Film- un Kulturpriesen vörslahn wesen. Dorvun hett se de nafolgenden wunnen:

• 1996: Bayerisch Filmpries in de Kategorie Best Jungdorstellersche för Nach Fünf im Urwald.
• 1998: Bayerisch Feernsehpries för Opernball.
• 1998: Bambi in de Kategorie Film Natschonal för Lola rennt.
• 1999: Internatschonale Filmmusik Biennale: Sünnerpries vun de Düütschen Phono-Akademie för Lola rennt tosamen mit Thomas D.
• 1999: Düütsch Filmpries as Schauspelersche vun’t Johr (Tokiekerpries).
• 2000: Düütsch Filmpries as Schauspelersche vun’t Johr (Tokiekerpries).
• 2002: Capo-Ciceo-Pries, düütsch-italienisch Kulturpries.
• 2008: Adolf-Grimme-Pries in de Kategorie Rutragen enkelte Leistung för Der die Tollkirsche ausgräbt.

Böker

• Franka Potente / Max Urlacher: Berlin – Los Angeles. Ein Jahr, Herder 2005, ISBN 3-451-28847-8
• Franka Potente / Karsten Schellenberg: Kick Ass – Das alternative Workout, Goldmann 2009, ISBN 3-442-39161-X

Weblenken

Franka Potente. Mehr Biller, Videos oder Audiodateien to’t Thema gifft dat bi Wikimedia Commons.

• Franka Potente in de Internet Movie Database (engelsch)
• Literatur vun un över Franka Potente in de Düütschen Natschonalbökeree
• Biografie op film-zeit.de
• Franka Potente in’t Interview: „Ich gelte in der Branche nicht als schön“, Frankfurter Allgemeine Sonntagszeitung, 26. November 2006, mit vele Biller
• Fotos vun Franka Potente