Elektronvolt

Eenheit
Norm	Natüürlich Eenheit
Naam	Elektronvolt
Grött	Energie
Eenheitenteken	eV
Formelteken	E
In SI-Eenheiten	1,602 176 462(63) · 10-19 J
nöömt na	Elektron, Alessandro Volta

Dat Elektronenvolt oder Elektronvolt (Eenheitenteken eV) is en Eenheit vun de Energie, de vör allen in de Atom-, Karn- un Deelkenphysik bruukt warrt. Normgerecht un na dat Gesett richtig is in Düütschland blots de Beteken Elektronvolt (kiek dorto dat Gesett över Eenheiten in’t Maatwesen un DIN 1301).

Definitschoon

1 eV = 1,602 176 462(63) · 10^-19 J

Een Elektronvolt is de Energie, de een Deelken mit de Laden 1 e (Elementarladen) kriggt, wenn dat de elektrische Spannung vun 1 V dörlöpt. In’t Vakuum warrt dat Deelken dordör versnellt un winnt kineetsch Energie.

In dat SI-Eenheitensystem lett sik disse Energie ümreken, wenn man de Elementarladen an de Steed vun e setten deit:

1 eV = 1,602·10^-19 C · V = 1,602·10^-19 A·s·V = 1,602·10^-19 W·s = 1,602·10^-19 J

Verwennen

Dat Elektronvolt warrt in de Atomphysik an annere verwandte Fachrebeden, sünners in de experimentellen Deelkenphysik as „handliche“ Maateenheit bruukt. De Rohmasse vun Elementardeelken aver ok de Energie, op de se in Deelkengaumakers (Synchrotron) brocht warrt, warrt in Elektronvolt angeven. De Ümreken op de Physik passeert över de bekannte Glieken ut de speziellen Relativitätstheorie

$E=m\cdot c^{2}$,

wobi $E$ för de Energie, $m$ för de Masse un $c$ för de Vakuumlichtsnelligkeit steiht. Dorna is 1 eV/c² ruchweg 1,8·10⁻³⁶ kg.

Begäbng sünd de nafolgend dezimal Veelfachen vun dat Elektronvolt:

• keV (Kilo-Elektronenvolt)
• MeV (Mega-Elektronenvolt) (de Rohenergie vun’n Elektron is ungefäähr 0,51 MeV)
• GeV (Giga-Elektronenvolt) (de Rohenergie vun’n Proton is ungefäähr 0,94 GeV)
• TeV (Tera-Elektronenvolt)

De kineetsche Energie vun gau bewegte sworere Atomkarns (Sworionen) warrt faken per Nukleon angeven. As Eenheit warrt denn AGeV, wobi A för de Massentall steiht. Dorbi gellt: En Karn mit 1 AGeV is jümmer liek gau. Analog gifft dat je na Energierebeet dat ATeV un dat AMeV.

To’n Vergliek: De Splittprodukten vun en Karnsplitten hebbt tohopen en kineetsch Energie vun ruchweg 200 MeV. En tyypsch Molekül in de Atmosphäär hett en thermsch Energie vun üm un bi 0,03 eV. De Photonen vun’t sichtbore Licht (root) hebbt en Energie vun ungefäähr 2 eV.

To’n Ümreken vun de middlere kinetische Energie vun de Deelken in en ideal Gas in de Temperatur vun’t Gas, warrt mit ${\frac {2}{3}}\cdot 11.605$ K/eV multiplizeert. Kiek dorför ok bi Maxwell-Boltzmann-Verdelen.