Bahnstieg

Vun Wikipedia
(wiederwiest vun Butenbahnstieg)
Blick op en Bahnstieg in’n Hauptbahnhoff Hamborg

En Bahnstieg (in öllere Spraak ok Perrong) is en faste Plattform, de bi en Bahnhoff langs en Gleis anleggt is, dat Lüüd ut en Iesenbahn-Tog in- un utstiegen köönt. Ok Stratenbahnen, U-Bahnen un Seelbahnen hebbt Bahnstieg’.

Typen[ännern | Bornkood ännern]

1: Siedenbahnstieg (un gliektiedig Huusbahnstieg)
2: Tungenbahnstieg
3 un 4: Middelbahnstieg
ne’en Bahnstieg warrt boot in Blindheim an de Donautalbahn (2012)

Huusbahnstieg[ännern | Bornkood ännern]

De Huusbahnstieg is de Bahnstieg, de direkt vör dat Empfangsgebüüd von en Bahnhoff liggt, ahn dat een över annere Gleise röver mutt. Dat is dormit jümmer ok en Siedenbahnstieg.

Siedenbahnstieg[ännern | Bornkood ännern]

En Siedenbahnstieg oder ok Butenbahnstieg liggt blots mit een Sied an en Gleis un is dorüm normalerwies an’n Rand von en Bahnhoff. Siedenbahnstieg’ sünd de Form, de licht to boon is, wenn en Iesenbahnlien al besteiht un en neet Bahnhoff boot warrt.

Middelbahnstieg[ännern | Bornkood ännern]

En Middelbahnstieg hett Gleise an beide Sieden.

Twüschenbahnstieg[ännern | Bornkood ännern]

En Twüschenbahnstieg is en Bahnstieg, de twüschen twee Gleise liggt, aver blots Togang to een Gleis büddt. Fohrgäst mööt över dat annere Gleis röver, üm na’n Twüschenbahnstieg to kamen. Vondaag is dat in Düütschland nich mehr verlöövt, ne’e Twüschenbahnstieg’ antoleggen.

Tungenbahnstieg[ännern | Bornkood ännern]

En Tungenbahnstieg is en Middelbahnstieg, de von en Dwarsbahnstieg aftwiegt.

Tweeschenbahnstieg[ännern | Bornkood ännern]

En Tweeschenbahnstieg warrt billt von twee Bahnstieg’, de to beide Sieden von en Gleis liggen doot. En Tweeschenbahnstieg kann to’n Bispeel bruukt warrn, dat de Lüüd op de een Sied instiegen doot un na de annere Sied utstiegen (Spaansche Methood).

Dwarsbahnstieg[ännern | Bornkood ännern]

En Dwarsbahnstieg is keen echten Bahnstieg, von wegen dat dor keen Tog höllt. De Dwarsbahnstieg verbinnt blots de Bahnstieg’ von en Koppbahnhoff mitenner.

Kombibahnstieg[ännern | Bornkood ännern]

En Kombibahnstieg is en Bahnstieg, an den op de twee Sieden twee verscheden Verkehrsmiddels hollt (to’n Bispeel en Iesenbahn-Tog un en Stratenbahn).

Weblenken[ännern | Bornkood ännern]

Bahnstieg. Mehr Biller, Videos oder Audiodateien to’t Thema gifft dat bi Wikimedia Commons.