Ansläge in Norwegen 2011

Dor weer de Anslag in Oslo

De Insel Utøya

Dat Ööl- un Energieministerium, dat dör de Bomb to schden kamen is

De Binnenstadt vun Oslo is en tiedlang afspeert wurrn, as dor al uprüümt wurrn is.

Bi de Ansläge in Norwegen an'n 22. Juli 2011 sund um 15.22 METZ bi en Exploschoon bi en Huus vun de Regeerung in't Zentrum vun de norweegsche Hööftstadt Oslo acht Minschen umbrocht un 10 verwunnt wurrn. Um un bi twee Stunnen later gung dat los, un up dat Eiland Utøya is en Anslag utöövt wurrn up en Ferienlager vun de Jöögdorganisatschoon vun de sozialdemokraatsche Arbeiderpartiet, Arbeidernes Ungdomsfylking. En Mann hett um un bi 90 Minuten mit en Halfautomaatsche Wapen up de Oppers schaten, de nix harrn, um sik to verdeffendeern. De Polzei seggt, dor weern 68 Minschen bi an'e Siet brocht wurrn. Noch en Opper is eene Weeke later an siene Wunnen sturven. Alltohopen sünd bi de Ansläge 77 Minschen umkamen. De Norweger Anders Behring Breivik is fröh an den Avend vun'n 22. Juli up dat Eiland fastnahmen wurrn. He schall den Anslag utöövt hebben. Breivik hett an'n neegsten Dag togeven, dat he dat maakt harr. He meen, dor stunn sien Haat up den Islam achter. Ehr he losgung to den Anslag, harr he en Schrieven vun mehr as 1.500 Sieten wegschickt, wo he versoch, de Grünn for den Anslag to verklookfideln. An'n 29. November 2011 hett en Gootachten vun de Forensische Psychiatrie bekannt maakt, dat Breivik an en sware Psychose leden harr un to de Tied vun den Anslag nich wuss, wat he maken dö. Vundeswegen kann em de Schuld an den Anslag nich torekent weern.

An' 24. August 2012 wurr Breivik vun en Gericht in Norwegen för torekensfähig verkloort un to 21 Johren Gefängnis mit ansluuten Sekerheitsverwohrung veroordeelt.