Wilhelm Geerken

Vun Wikipedia

Wilhelm Geerken (* 11. Juli 1881 in Horst; † 16. Juni 1969 in Buxthu) weer en düütschen Politiker von de SPD.

Geerken is 1881 in Horst in Holsteen boren. He weer op de Volksschool un hett denn en Lehr as Koopmann maakt. Bet 1901 hett he as Handlungsgehilfe arbeidt un weer in de Tied von 1901 bet 1903 Soldaat. Von 1903 bet 1905 hett he in verscheden Firmen as Handlungsgehilfe un Reisender arbeidt. Blangenbi weer he von 1904 afan ok sülvstännig Koopmann. 1906 hett he sien egen Porzlaan-Geschäft in Buxthu apenmaakt. In’n Eersten Weltkrieg weer he von 1914 bet 1918 Soldaat.

Na’n Krieg güng he 1919 in de SPD un weer later Vörsitter in’n Kreisverband Jörk un Viez-Vörsitter von’n Ünnerbezirk Ünnerelv. Al siet 1919 weer he Raadsmann in’n Stadtraad von Buxthu un Afornten in’n Kreisdag von’n Kreis Jörk. Disse Ämter hett he 1933 mit de Machtergreifung verloren. Na 1933 is Geerken en poor Maal verhaft worrn un keem an’n 22. August 1944 korte Tied in dat Arbeitserziehungslager Farge.

Na’n Tweten Weltkrieg weer Geerken von 1945 bet 1948 Börgermeester von Buxthu (toeerst von de Briten insett, 1946 wählt). Geerken weer denn ok Maat von’n ernannten Hannöverschen Landdag von’n 23. August 1946 bet to’n 29. Oktober 1946. Von’n 9. Dezember 1946 bet to’n 28. März 1947 weer he Maat von’n ernannten Landdag von Neddersassen. As wählt Maat in’n Landdagswahlkreis Buxthu weer he in de eerste un twete Wahlperiood von’n 20. April 1947 bet to’n 5. Mai 1955 in’n Landdag von Neddersassen. In’n Stadtraad von Buxthu weer he bet 1964.

An’n 21. Januar 1965 is he Ehrenbörger von de Stadt Buxthu worrn. Na em hett ok de Wilhelm-Geerken-Weg in Buxthu sien Naam kregen.