Trindade un Martim Vaz

Vun Wikipedia
Olle Kort vun’t Eiland Trindade
Satellitenbild vun Matim Vaz un de Eilannen ümto
Bild vun de Landschop

Trindade un Martim Vaz sünd en Inselgrupp in’n Atlantik. Se höört to Brasilien, to’n Bundsstaat Espirito Santo, un leegt ruchweg 1.200 km ööstlich vun Vitória. För de Eilannen sünd ok de Naams Trinidad un Martin Vas begäng.

Geologie un Geografie[ännern | Bornkood ännern]

De Eilannen sünd dör Vulkanismus tostannen kamen. Nipp un nau hannelt sik dat bi de Inselgrupp üm dat Produkt vun en Mantelplume, un man snackt bi de Gegen ok vun den Trindade-Hotspot. De Plume schall in Verbinnen stahn mit de Paraná-Flootbasalten op’t brasilaansche Fastland.[1] De Landschop op de Eilannen is dörsett vun Kluften. Bit in’t 19. Johrhunnert geev dat hier ok noch Woold, man vundaag wasst dor nix mehr, mit Utnahm vun de süüdlichen Deel vun Trindade.

Dat Eiland Trindade is de gröttste vun de Eilannen. Se hett en Flach vun ruchweg 10,1 km² un liggt bi 20° 31′30″S, 29° 19′30″W – üm un bi 47 km westlich vun de Inselgrupp rund üm Martim Vaz. De annern Eilannen leegt dicht tohopen un warrt ok Ilhas de Martim Vaz nöömt. Dat Hööfteiland is de Ilha Martim Vaz (ok Ilha da Racha) is dorvun wedder de gröttste. Se liggt bi 20° 30′18″S, 29° 20′42″W un reckt bit to 175&m hooch. Dorto kamt de Ilha do Norte (20° 30′00″S, 28° 51′00″W) mit bit to 75 m Hööch, de Ilha do Sul (20° 31′00″S, 28° 51′00″W), de den ööstlichsten Punkt vun ganz Brasilien dorstellt un noch en poor lütte Vulkanfelsen, de ut dat Water rutkieken doot. De gröttse dorvun is de Rochedo Agulha, de bit to 60 m hooch is.

Historie[ännern | Bornkood ännern]

De Eiland Trindade schall 1502 vun den galizischen Seefohrer João da Nova opdeckt worrn wesen, de in portugeesch Deensten weer. De Inselgrupp üm Martim Vaz hett de sülve Kaptein eerst 10 Johr later opdeckt. An Land gahn is he aver woll nich. Dat weer dat eerste mol 1514 de spaansch Seefohrer Juan de la Cosa, de dat Hööfteiland toeerst Santa Maria Esmeralda nöömt hett. In’t Johr 1768 is dat Eiland vun den franzööschen Seefohrer un Geografen La Pérouse besöcht worrn, de dor an Land gahn wull, üm op de Bargen to stiegen. Man, bi de Kledderee sünd welk vun sien Lüüd afstört un twee vun de Matrosen bleven dorbi dood. En dorvun hett Martim Vaz heten, un na em is de Inselgrupp dorna nöömt worrn.

Dat Eiland weer portugeesch Land bit to de Unafhangigkeit vun Brasilien, wovun de Eilannen denn Deel worrn sünd. Vun 1890 bit 1896 is dat Eiland Trindade vun Grootbritannien besett worrn, weer denn aver wedder an Brasilien torüch geven. Bit op den Posten Enseada dos Portugueses op Trindade, woneem ruchweg 32 brasilaansche Marinesoldaten Deenst maakt, sünd de Eilannen nich bewahnt.

Borns[ännern | Bornkood ännern]

  1. B. Steinberger: Plumes in a convecting mantle: Models and observations for individual hotspots. Journal of Geophysical Research, Bd. 105, S. 11127-11152, 2000

Weblenken[ännern | Bornkood ännern]


Koordinaten:20° 31′ S, 29° 19′ W