Thomas Diethart

Vun Wikipedia
Thomas Diethart (2014)

Thomas Diethart (* 25. Februar 1992 in Tulln) is en ehmalg öösterrieksch Skispringer.

Werdegang[ännern | Bornkood ännern]

Diethart reck an' 19. Januar 2008 in Eisenerz bi sien Debüt in' FIS-Cup den 23. Platz. Een Dag later keem he all up den 13. Platz. Bit to dat Johr 2009 harr he sück all bit in den Skisprung-Continentalcup hoocharbeit, keem dor aber nich so recht vöran.

Bi dat darte Springen vun de Veerschanzentournee 2010/2011 in Innsbruck wurr Diethart in de natschonale Grupp nomineert. Dor kunn he sück sogor för den Wettkamp qualifizeeren un keem nahderhen bi disse Veranstaltung up den 28. Platz un kunn eerste Weltcuppunkte winnen. He hett dorbi dorvan profiteert, dat de bulgaarsch Springer Wladimir Sografski disqualifizeert wurr, gegen de he in den K.-O.-Durchgang eegentlich verloren harr. An' 6. Februar 2011 wunn he in Brotterode eerstmals en Continental-Cup-Springen.[1]

Diethart kunn in' Sömmer un in' Dezember 2013 fiev Top-Ten-Resultate in' Continental Cup recken, dorünner en darten Platz an' 21. September 2013 in Klingenthal, so dat he för de Weltcup-Veranstaltung in Engelberg in' Dezember 2013 nomineert wurr. Nah meest dree Johr Weltcup-Abstinenz un Deelnahmen an ünnerklassigen Wettbewarfen kunn Diethart sück dor för de Hööftwettbewarfen qualifizeeren, de he mit en veerten un en sössten Rang beennen kunn. Den eersten Podiumsplatz bi en Weltcup-Springen reck he denn in de folgen Week wiels de Veerschanzentournee 2013/14 in Oberstdorf mit Platz 3. Bi dat tweet Springen vun de Veerschanzentournee, dat Neejohrsspringen in Garmisch-Partenkirchen, kunn he an sien darten Platz in dat eerst Springen anknütten un wunn düütlich vör sien Teamkollegen Thomas Morgenstern un Simon Ammann ut de Swiez. He kunn dormit in sien sössten Wettbewarf in den FIS Weltcup sien eersten Sieg recken.[2] Nah een fievten Platz bi blots een werten Dörgang in Innsbruck gelung Diethart bi dat letzt Tourneespringen in Bischofshofen sien tweet Weltcupsieg, womit he sück to glieker Tiet den Gesamtsieg vun de Veerschanzentournee sekern kunn.

An'n 28. Februar 2016 is he bi en Continental-Cup-Springen in Brotterode swoor to fall kommen. He hett sück dorbi in't Gesicht besehrt, harr Prellungen an'n Rüch, an de Lung un an de Niere. Nahdem he sück dorvan verhaalt harr, is he blots noch mehrmals in den dartklassigen FIS-Cup an den Start gahn.

An'n 29. November 2017 is Diethart bi en Training van dat ÖSV-Kontinentalteam in de Ramsau an'n Dachstein weer swoor to Fall kommen. Bi den Afsprung verlor he de Kontroll över sie Ski un is up den Schanzenvörbo störrt. To de erheblich Besehren hörrn ünner annern en swoor Gehirnerschütterung mit lichte Inblööden in't Gehirn, en Lungenquetschung as ok starke Afschürfungen.

Dorvan hett he sück up Letzt nich noog verhaalt un in'n April 2018 hett he in dat Öller van 26 Johren sien Loopbahn ut gesundheitlich Grünnen afslooten.

Weblenken[ännern | Bornkood ännern]

Enkeld Nahwiesen[ännern | Bornkood ännern]

  1. Ergevnis bi www.berkutschi.com, afropen an' 9. Januar 2014.
  2. [1], afropen an' 9. Januar 2014.