Tears for Fears
Tears for Fears is en spoodrieke britische Musikgrupp ut Bath, England.
Historie[ännern | Bornkood ännern]
De Grupp Tears for Fears weer 1981 vun Roland Orzabal un Curt Smith grünnt. Den Naam hebbt se ut en Book vun den US-amerikaanschen Psychotherapeut Arthur Janov, de de Primärtherapie begrünnt hett. Janov sien Themen sünd ok de Grundlaag för vele vun de Ledertexten vun de Grupp.
Al 1980 hebbt de Musikers dat Album Acting My Age as de Grupp Graduate rutbröcht. Disse Grupp weer ut en Schölergrupp entstahn. Orzabal weer ok dormols al de Singer und Lederschriever. Annere Musikers ut de Grupp weern domols Steve Buck, Andy Marsden un John Baker. Man de Musik güng noch in en annere Richt un beweeg sik eher twüschen Ska un Popmusik.
Dat eerste Album as Tears for Fears keem mit The Hurting in’t Johr 1983 op’n Markt. De Leder harrn en teemlich egenen Stil un bröchen de swore Kindheit vun Orzabal to’n Utdruck. Dat Album harr internatschonal groten Spood. Mit Suffer the Children, Change, Mad World un Pale Shelter sünd dorvun veer Singles utkoppelt worrn. Dat Leed Mad World is 2000 vun Gary Jules un Michael Andrews as Titelleed to den Film Donnie Darko nee opnahmen worrn un keem 2003 wedder in de Charts.
In’t Fröhjohr 1985 keem dat tweete Album Songs from the Big Chair rut, mit dat de Grupp to jemehrn för de laten 1980er Johren tyypschen Sound vun’n Synthie Pop funnen hebbt. Dat bleev jemehr Stil. Mit dat Album sünd se op beide Sieten vun’n Atlantik düchtig bekannt worrn. Ut dat Album stammt de beiden Singles Shout un Everybody Wants to Rule the World, de ok vundaag noch regelmatig in’t Radio to höörn sünd. Dat tweete dorvun weer in de USA to dat bekannste Leed vun’t Johr wählt.
An de beiden eesten Albums weern ok de fasten Gruppenliddmaten Manny Elias (Slagtüüch) un Ian Stanley (Keyboards) bedeeligt. Stanley hett ok an de Hits Shout, Everybody Wants to Rule the World un Mothers Talk mitschreven. Stanley weer to’n letzten mol bi dat drüdde Album The Seeds of Love dorbi, dat 1989 rutkeem un Inflüss vun Jazz un Blues opwiesen de. In de Hit-Single Sowing the Seeds of Love weer de Influss vun The Beatles to marken. Dat Kunzeptaöbum geiht ’n beten in de Richt vun den jemehr Sgt. Pepper’s Lonely Hearts Club Band. Bi de Single Woman in Chains speel Phil Collins dat Slagtüüch. Oleta Adams, de dör Orzabal sien Todoon en spoodrieke Solo-Loobahn anfangen künnen, weer as Singersche un Pianistin an’t Album bedeeligt.
Na jemehr letzten gemeensomen Tournee to dat Album is Curth Smith Enn 1990 ut de Grupp utstegen. De Albums, de vun dor an publizeert worrn sünd, hett Orzabal alleen produzeert. Siet 2000 hebbt de beiden Grünners wedder Kuntakt mit’nanner. 2004 hebbt se denn ok wedder tosamen en Album rutbröcht.
En nächst Weddervereenigen vun de beiden geev dat 2008 för de Kunzepttour The Nokia Night of the Proms, op de se ok wedder vele vun jemehr ollen Hit-Leder speelt hebbt.
Studioalbums[ännern | Bornkood ännern]
- 1983: The Hurting
- 1985: Songs from the Big Chair
- 1989: The Seeds of Love
- 1993: Elemental
- 1995: Raoul and the Kings of Spain
- 2004: Everybody Loves a Happy Ending
- 2022: The Tipping Point