Rolf Speckmann
Rolf Speckmann (* 22. April 1918 in Bremerhoben; † 2. Dezember 1995 in Quelkhorn, hüdigendags Gemeen Otterbarg) weer en düütschen Politiker vun de FDP un höör to den Bremer Senat. Vun Beroop harr he Bankkoopmann lehrt.
Leven
[ännern | Bornkood ännern]Wat he lehrt hett un wat he for’n Beroop utöövt hett
[ännern | Bornkood ännern]Speckmann besoch de Willem-Raabe-Scholen in Geestmünn, wat dormols to Preußen tohören dö. 1935 hett he bi de Spaarkass Wersermünn en Banklehr maakt. De hett he 1937 up de düütsche Spaarkassenschool in Hannober afslaten. Vun 1939 bit 1948 weer he in’n Tweeten Weltkrieg Suldat un Kriegsgefangenen.
Achterna hett he wedder bi de Spaarkass Wersermünn in Bremerhaben arbeit, tolest as Bankamtmann. 1955 is he Afdeelungsdirekter bi de Bremer Landsbank/Staatlich Kreditanstalt Ollenborg in Bremen wurrn un hett dor ok dat Sekretariat vun’n Vörstand in’e Hand harrt. In’t Nevenamt hett he to’n Vörstand vun de Noorddüütsche Finanzeerungs AG mit tohöört. 1960 is he Direkter vun de Noorddüütsche Kreditbank in Bremen wurrn un hett ok de Geschäfte föhrt bi de Visurgis-Teilzahlungsbank un bi de Bremerhabener Grundstück- un Verwaltungs-Sellschop. Vun 1966 bit 1971 is he Senater ween. Nadem he in’e Politik Bott geven harr is he Spelsberg un Vesper vun’n 1. Juli 1971 bit to’n 31. Dezember 1983 nafolgt as Liddmaat vun den Vörstand un as Vörsitter vun’n Vörstand vun de Spaarkass Bremen.[1]. In siene Tied is bi de Spaarkass allerhand ummuddelt wurrn. 1971 is he in den Vörstand vun den Düütschen Spaarkassen- un Giroverband beropen wurrn. Vun 1973 af an weer he ok Präsident vun den Verband vun de „Düütschen freen opentlichen Spaarkassen“. As sien Nafolger as Baas bi de Spaarkass in Bremen folg em 1984 Friedrich Rebers na. Speckmann weer verheiraat’ un harr dree Kinner.
Politik
[ännern | Bornkood ännern]Speckmann weer vun 1928 bit 1933 Liddmaat vun de Bündische Jugend. Vun 1953 af an höör he to de FDP to. Vun 1959 bit 1966 höör he to de Bremer Borgerschop mit to. Dor weer he ok en tiedlang Stellvertreder vun den Vörsitter vun de FDP-Borgerschopsfraktschoon. He folg Senater Johann Dietrich Noltenius (FDP) na un weer vun’n 19. Januar 1966 bit to’n 1. Juni 1971 Senater for de Finanzen unner de Borgermeesters Willy Dehnkamp (SPD) un (vun 1967 af an) Hans Koschnick (SPD). Speckmann hett sik for en Finanzpolitik insett, wo dat dor um gung, den Schullendeenst for den Staatshuushollt in Bremen nich over en bestimmte Grenz kladdern to laten. He hett de middelfristige Finanzplanung in’t Huushollt inföhrt.[2]. He meen 1971: „„Wenn mit de Finanzen nich rumaast warrt, blifft Bremen sülvstännig“ un fudder „De Finanzen vun dat Land Bremen mütt gesund blieven, se dröövt nich in Gefohr kamen vunwegen to hoge Schullen. Se mütt jummers utgleken ween.“[3] To siene Tied as Senater hett de Bund 1969 dat Gesett over de Finanzverfaten beslaten, un de Länner hefft dor bi mitmaakt. Dor weer in afmaakt, dat de Lüde, de in Bremen arbeiden, man in de Gemeenen dor umto wohnen döen, ehre Lohnstüer betahlen mössen an dat Land, wo se in leven döen (also meist Neddersassen). So gung dat los mit dat Umverdeelen vun de Stüern, wat for Bremen nich good weer. Tolest keem dat so, dat bit to’n Enne vun dat Johrhunnert Bremen up en unbannigen Barg Schullen sitten dö.[4]. Tohopen mit de FDP hett he den Senat 1971 verlaten. Dormols harrn se sik in’e Klatten vunwegen de Universität Bremen, de dor upmaakt wurrn is. As Finanzsenater folg em Oskar Schulz vun de SPD na.
Kiek ok bi
[ännern | Bornkood ännern]- 1965–1967: Senat Dehnkamp, 1967–1971: Senat Koschnick I
Literatur
[ännern | Bornkood ännern]- Handbuch der Bremischen Bürgerschaft