Richard Francis Gordon

Richard Francis Gordon - offiziell NASA-Foto

Richard Francis „Dick“ Gordon, Jr. (* 5. Oktober 1929 in Seattle, Washington, USA; † 6. November 2017 in San Marcos, Kalifornien) weer en ehmalger US-amerikaansch Astronaut.

Leven

Gordon hett 1947 de High School in Poulsbo, en Lüttstadt 35 Kilometer nordwestlich vun Seattle, verlaaten un fung ansluutend en Chemiestudium an de University of Washington an. Nah sien Bachelor-Afsluss dor in' Sömmer 1951, wurr he vun de US-Marine in Pensacola (Florida) to'n Piloten utbildt, folgt vun en Tosatzlehrgang för Düsenmaschinen.

In Jacksonville (Florida) hett Gordon dree Johr bi en Geschwader deent, bit he Anfang 1957 an de United States Naval Test Pilot School in Maryland annommen wurr. In' Juli 1957 weer sien Utbillen to'n Testpiloten afslooten (een vun sien Lehrer weer Alan Shepard). In de Folge hett he an den Marinestüttpunkt Patuxent River Maschinen vun de Typen F-8U „Crusader“, F-11F „Tiger“ un FJ „Fury“ test.

As Testpilot broch Gordon dat Jagdfloogtüüch F-4 „Phantom II“ to de Insatzriep. Mit en F-4H stell he in' Mai 1961 mit 1.399,7 km/h en nee Geschwindigkeitsrekord up, as he de Transkontinentalstreck vun Los Angeles nah New York in blots 2 Stünn un 47 Minüüt torüchlegg. An de Naval Air Station Miramar in Kalifornien hett he Marinepiloten in' Umgang mit dit nee Jagdfloogtüüch utbildt.

Mit en Geschwader wurr Gordon in' November 1962 mit den Floogtüüchdräger „USS Ranger“ in Richt Fernost entsandt. Nahdem man Japan un dat Süüdchineesch Meer bereist harr, is de Eenheit in' Juni 1963 in den Heimathaben Alameda (Kalifornien) weer torüchkehrt. Ansluutend hett Gordon de Naval Postgraduate School in Monterey besöcht, dat Studium aber nich afslooten.

NASA-Tätigkeit

Gordon harr sück all 1962 för de tweet Astronautengrupp bi de NASA bewurben, wurr aber nich utwählt. Bi de nächste Utwahl wurr he denn aber annommen un wurr in' Oktober 1963 offiziell vörstellt.

Nah en half Johr theoretisch Utbillen kreeg in' Juli 1964 jeder vun de 14 nee Astronauten en Rebeet todeelt, för dat he verantwoortlich weer. Gordon weer för de Gestaltung un Anordnung vun de Bedeenelemente vun dat Apollo-Raumschipp tostännig. Dorto hett he eng mit de Techniker vun de Hersteller tosommen arbeit.

Siet September 1965 weer Gordon in de Ersatzmannschap vun Gemini 8 un wurr en half Johr later as man dat verwachten kunn in de Floogmannschap vun Gemini 11 befördert. Disse dree Daag düern Mission ünner dat Kommando vun Charles Conrad funn in' September 1966 statt. Hööftupgaav weer de Annäherung un Kopplung mit den Teelsatelliten Agena, wat denn ok klappt hett. Egordon hett forto wiels disse Mission ok noch twee Utstieg ut dat Ruumschipp an twee verscheeden Daag maakt.

En Johr nah sien Jumfernfloog wurr Gordon to'n Pilot vun de Kommandokapsel vun de Apollo-8-Ersatzmannschap bestimmt, um negen Maand later in disse Funktschoon för Apollo 9 upstellt to wurrn.

Af März 1969 hörr Gordon as Pilot vun de Kommandokapsel to de Mannschap vun Apollo 12. As bi sien eerst Mission mit Gemini 11 weer de Kommandant ok hier Charles Conrad. Apollo 12 weer de tweete bemannte Lannen up den Maand un funn in' November 1969 statt. Nahdem de Maandfähre „Intrepid“ land weer, hemm Conrad as dart un Maandfährenpilot Alan Bean as veert Minsch den Maand betreeden. Gordon bleev wiels de gesamt Mission an Bord vun dat Kommandomodul „Yankee Clipper“.

An' 26. März 1970 wurr de Crew vun Apollo 15 bekanntgeven, mit Gordon als Ersatzkommandant. Dat weer dormals begäng, dat de Ersatzmannschap dree Flüüg later de Hööftmannschap billen dee un so kunnen Gordon, Vance Brand un Jack Schmitt dorvan utgahn, dat se för Apollo 18 nomineert würrn. An' 2. September 1970 wurr disse plaant Floog ebenso as Apollo 19 un 20 vun de NASA streeken.

Gordon hett de NASA in' Januar 1972 verlaaten un gung tonächst in den Sport: He weer fiev Johren lang Viezpräsident vun de „New Orleans Saints“, en Football-Club in de NFL-Profiliga. Ansluutend hett he för en lütt Sett en texaansch Chemieünnernehmen leit (Energy Developers). 1978 övernehm he för dree Johr de Führung vun de Resolution Engineering and Development Company, de sück mit dat Bruukbarmaaken vun wild Eerdöölborns befaaten dee. Tüschen 1981 un 1983 weer he Direkter för den Beriek Los Angeles bi Scott Science and Technology. Todem weer he af 1982 Präsident vun de Astro Sciences Corporation.

Gordon weer in tweet Ehe verheiraadt un hett söss Kinner.

Besünnerheiten un Rekorde

• 1966–1968 tosommen mit Charles Conrad Rekordholler för de gröttste Entfernung vun de Eer (1.374 km mit Gemini 11)

Weblenken

Richard Gordon. Mehr Biller, Videos oder Audiodateien to’t Thema gifft dat bi Wikimedia Commons.

• Homepage von Richard Gordon (engelsch)
• NASA-Biografie (engelsch)