Peter Harry Carstensen

Vun Wikipedia
Peter Harry Carstensen 2006

Peter Harry Carstensen (* 12. März 1947 op Noordstrand) is en düütschen Politiker vun de CDU.

He weer van 27. April 2005 bit 12. Juni 2012 de Ministerpräsident vun Sleswig-Holsteen.

Carstensen snackt Plattdüütsch un hett 2008 ok en Höörbook mit plattdüütsche Geschichten opnahmen.

Wat he lehrt hett[ännern | Bornkood ännern]

Carstensen is de Söhn vun en Buern. 1966 hett he Abitur maakt un denn en Praktikum in'e Landweertschop afleggt. Vun 1968 bit 1973 studeer he Agrarwetenschop in Kiel. Amenne is he denn Diplom-Agraringenieur ween. In'e Studientied his he Liddmaat wurrn vun de „Schlagende Verbindung“ Landsmannschaft Troglodytia in'n Coburger Convent (1998 is he dor wedder uttreden). 1976 hett he dat Tweete Staatsexamen för dat Lehramt afleggt un is denn bit 1983 Schoolmeester för Landweertschop an de Landweertschopsschool in Bredstedt in Noordfreesland wurrn. Bito weer he Weertschopsberader bi de Landweertschopskamer Sleswig-Holsteen. Bit to de Tied, as he Kannedat to'n Ministerpräsidenten weer, hett he in'n Upsichtsraat vun de CG Nordfleisch AG seten (hüdigendags Vion Food Hamborg).

Familie[ännern | Bornkood ännern]

Peter Harry Carstensen is Weetmann un hett twee Döchter. Siene jungere Dochter Anja-Christina Carstensen befaat sik mit Pötteree. In'n August 2004 hett dat Dageblatt „Bild“ ene ne'e Fro för em söcht. He weer dor mit inverstahn. Later hett he seggt, düsse Aktschoon, dat weer en Fehler. An'n sien 60. Geboortsdag hett he denn vör al Lüde siene ne'e Partnerin vörstellt. Dat weer de Juristin Sandra Thomsen, de 1971 boren is.[1]

Partei[ännern | Bornkood ännern]

Vun 1971 af an höört Carstensen to de CDU to. Vun 1986 bit 1992 weer he Vörsitter vun den CDU-Kreisverband Noordfreesland. Vun Juli 2000 af an weer he eerst stellvertredend Vörsitter un vun den 2. Juni 2002 af an Vörsitter vun de CDU in dat Land Sleswig-Holsteen.

Bi de Landdagswahl 2005 weer Carstensen Toppkannedat för de CDU. Unner sien Leit hett de CDU dor denn dat beste Resultaat schafft, siet Uwe Barschel 1987 Bott geven harr. Dat weern 40,2 % vun de Stimmen. To'n eersten Mol siet 1983 is de CDU dor ok wedder de starkste Fraktschoon in den Landdag mit wurrn. Vörsitter vun de CDU-Fraktschoon in'n Landdag weer he vun'n 1. März bit to'n 27. April 2005.

Afordenten[ännern | Bornkood ännern]

Vun 1983 af an weer Carstensen Liddmaat in'n Düütschen Bundsdag. Vun 1994 bit 2002 is he dor Vörsitter vun den Utschuss för Ernähren, Landweertschop un Forsten (na 2001: Utschuss för Verbrukerschuul, Ernähren un Landweertschop) ween. As he to'n Ministerpräsidenten vun Sleswig-Holsteen wählt wurrn weer, hett he an'n 20. April 2005 sien Sitt in'n Bundsdag afgeven.

1998 weer Carstensen över de List vun dat Land Sleswig-Holsteen in'n Bundsdag intagen, sunst weer he jummers direkt wählte Afordente vun den Bundsdagswahlkreis Noordfreesland - Dithmarschen Noord in den Bundsdag intagen.

Vun dat Johr 2005 bit 2012 weer he Liddmaat vun den Landdag in Sleswig-Holsteen.

Belegen[ännern | Bornkood ännern]

  1. Hamburger Abendblatt: Die Neue an Carstensens Seite 13. März 2007


Warken[ännern | Bornkood ännern]

  • Peter Harry Carstensen vertellt Riemels un Geschichten. (Höörbook) Michael Jung, Kiel 2008, ISBN 978-3-89882-098-1

Weblenken[ännern | Bornkood ännern]

Peter Harry Carstensen. Mehr Biller, Videos oder Audiodateien to’t Thema gifft dat bi Wikimedia Commons.