Paul Neese

Steel för Paul Neese vör dat Zementmuseum Hemmoor

Paul Neese (* 10. April 1939 in Westersood; † 3. April 2000 in Hemmoor) weer en düütschen Politiker von de SPD.

Neese is 1939 in Westersood boren un weer dor von 1946 bet 1954 ok op de Volksschool. Na de School hett he von 1954 bet 1957 en Lehr as Maschinenslosser bi de Hemmoor Zement AG maakt. 1959 is he in de IG Chemie-Poppeer-Keramik ringahn un 1963 in’n Bedrievsraad von de Hemmoor Zement AG wählt worrn. 1965 bet 1967 weer he de Viez-Vörsitter un 1967 bet 1983 de Vörsitter von’n Bedrievsraad.

Neese is 1959 in de SPD ringahn. He weer Kreisvörsitter von de SPD in’n Landkreis Cuxhoben un Maat von’n SPD-Bezirksvörstand Noord-Neddersassen. Von 1964 bet to’n 30. Juni 1968 weer he in’n Raad von de Gemeen Westersood. Nadem Westersood an’n 1. Juli 1968 mit fiev annere Gemenen to de ne’e Gemeen Hemmoor tohoopgahn is, weer he dor ok in’n Raad un von 1981 bet 2000 Börgermeester von Hemmoor. As de Samtgemeen Hemmoor 1972 grünnt worrn is, is he dor ok in’n Samtgemeenraad kamen. He weer von 1986 bet 1997 Börgermeester von de Samtgemeen. 1972 bet 1977 weer he in’n Kreisdag von’n Landkreis Land Hadeln un na dat Tohoopgahn von Hadeln mit Cuxhoben un den Landkreis Wersermünn to’n Landkreis Cuxhoben von’n 1. August 1977 af an in’n Kreisdag von’n Landkreis Cuxhoben. Neese is in de negente bet ölvente Wahlperiood von’n 21. Juni 1978 bet to’n 20. Juni 1990 Maat von’n Neddersassischen Landdag wesen. Von’n 22. Juni 1982 bet 20. Juni 1990 weer he Schriftföhrer von’n Landdag.

1994 wer he Mitgrünner von de Kulturstiftung Zement ut Hemmoor, de nu dat Zementmuseum Hemmoor bedrifft.

An’n 18. März 1985 hett Neese de Ehrennadel von de Stadt Hemmoor kregen un an’n 27. September 1994 ok den Ehrenring. Dat Bundsverdeenstkrüüz hett he an’n 22. März 1991 kregen.