Paul Ariste

Paul Ariste (* 3. Februar 1905 in Torma, Kreis Jõgeva; † 2. Februar 1990 in Tartu) weer en eestnischen Linguist.

Ariste is 1905 in Torma as Paul Berg boren. Sien Vadder heet Alexander Berg. De eestnische Form vun sien Naam hett he eerst 1927 annahmen. He hett vun 1925 af an bet 1929 an de Universität Dorpat studeert un dor 1931 sien Magister-Afsluss maakt. Dat Thema vun sien Arbeit weren sweedsche Lehnwöör in de eestnische Spraak (Eesti-rootsi laensõnad eesti keeles). Vun 1933 af an hett he an de Universität Dorpat lehrt. De Dokterarbeit 1939 weer över de Dialekt vun Hiiu (Hiiu murrete häälikud). 1944 hett he den Lehrstohl för eestnische Spraak un finnougrische Spraken övernahmen. 1945 bet 1946 weer he bi de Sowjets in Haft, dat he bi de Studentenorganisatschoon Veljesto wesen is. Vun 1946 bet 1977 harr he den Lehrstohl för finnougrische Spraken.

Ariste hett en ganze Reeg Spraken snackt un lehrt. Blangen Eestnisch hett he sik vör allen för dat Wotische intresseert. Aver ok Finnsch, Sweedsch, Lettsch, Nedderdüütsch un Esperanto hören dorto. Ok mit dat Jiddische un de Spraak vun de Taters in’t Baltikum hett he sik beschäftigt. He hett alltohoop bi 1300 Schriften un dorvun 50 Böker schreven.

He höör to de wichtigsten Lüüd, de dor wedder för sorgt hebbt, dat de finnougrischen Spraken in de Sowjetunion wedder utforscht un lehrt warrt. Ariste hett ünner annern de Tietschrift Sovetskoye finnougrovedeniye (Советское финноугроведение; Sowjetsche Finnougrische Studien, later Linguistica Uralica nöömt) rutgeven.

He weer ok en wichtigen Esperantisten un 1963 bet 1967 Maat vun de Esperanto-Akademie.

1954 is he Maat vun de Akademie vun de Wetenschoppen in de Eestnische SSR worrn. Ünner annern vun de Universität Helsinki hett he den Ehrendokter kregen.