Otto Peschel

Vun Wikipedia

Otto Peschel (* 28. August 1915 in Kraupa; † 18. November 1986) weer en düütschen Politiker von de FDP.

Peschel is 1915 in Kraupa boren un hett na dat Gymnasium en Lehr as Koopmann maakt. Later weer he bi de Marien un dor Kapitänleutnant un Kummandant von en U-Boot. Na’n Tweten Weltkrieg hett he 1947 in Basbeek en Laden för Papeer un Bürokraam apenmaakt. He hett denn noch en Prüfung as Bookhändler maakt un sien Laden to en Bookhannel utboot.

He hett 1945 de Neddersassische Landspartei mit grünnt, ut de in’n November 1946 de Düütsche Partei worrn is. As de Düütsche Partei uteneengahn is, is he in de FDP rin.

He weer von 1948 af an Raadsherr in Basbeek un von 1957 af an bet to dat Enn von de Basbeker Egenstännigkeit mit de Fusion to de Gemeen Hemmoor an’n 30. Juni 1968 Börgermeester von dat Dörp. Von 1957 bet 1965 weer he toglieks ok Gemeendirekter von Basbeek.

Peschel weer von 1948 af an Raadsherr in’n Kreisdag von’n Landkreis Land Hadeln. Mit Utnahm von een Wahlperiood von fiev Johr is he bet to dat Oplösen von’n Landkreis Land Hadeln 1977 in’n Kreisdag bleven. Von März 1966 bet Oktober 1968 weer he dor ok Landraad. In’n ne’en Landkreis Cuxhoben weer he von 1977 bet 1986 Viez-Landraad.

Von 1968 bet 1980 weer he Viezbörgermeester von de ne’e Gemeen Hemmoor. 1980 hett he na’n Dood von Helmut Grube de Ämter as Börgermeester von de Gemeen Hemmoor un von de Samtgemeen Hemmoor övernahmen un weer dat bet 1981.

1975 hett Peschel dat Bundsverdeenstkrüüz kregen. He hett ok den Ehrenring un de Ehrennadel von de Stadt Hemmoor kregen. In Hemmoor is siet Juni 2005 de Otto-Peschel-Straat na em nöömt.