Muskogee (Volk)
De Muskogee, ok Creek nömmt, sünd en Indianervolk ut Noordamerika, dat oorsprünglich ut den Süüdoosten vun de USA stamm. In hör eegen Spraak nömmt se sück Mvskoke oder Maskoki. Hüüd begäng is de dorvan afleit Schrievwies Muskogee, in de engelschspraakig Ruum ok Muscogee.
Hör Spraak Maskoki (mvskoke) hörrt to de Spraakgrupp vun de Muskogee-Spraaken. De Seminolen sünd eng verwandt mit de Muskogee un spreken ok de Maskoki-Spraak. De Muskogee sünd een vun de Fiev ziviliseert Natschonen. Hüüd leeft se vör allen in Oklahoma, Alabama un Florida.
Historie
[ännern | Bornkood ännern]Fröhhistorie
[ännern | Bornkood ännern]De fröhhistorschen Muskogee weern wohrschienlich de Nahfahren vun de Moundbuilders (Hügelbauer) vun de Mississippi-Kultur un mögelkerwies mit de Utinahica in Süüd-Georgia verwandt. Mehr en losen Bund as en slooten Stamm hebbt de Muskogee in sülvstännigen Dörper an Stroomdaalen in de hüüdig Staaten Georgia und Alabama leevt un bestunnen ut völ ethnisch Gruppen, de verscheeden Spraaken harrn. Dorto hörrn de Abihka, Alabama, Tallapoosa un Coushatta. Jene, de entlang vun den Ocmulgee River ansiedelt weern, wurrn vun britsch Hannelslüüd ut South Carolina „Creek-Indianer“ nömmt (engelsch: creek = lütten Stroom). Eventuell wurr de Naam aber ok generell all indigenen Völkern ut disse Region geven, also ok den Natchez un den Yuchi.
De Muskogee dreben Hannel mit hör nee britisch Nahbers un kreegen europäisch Waren tegen Hirschhuut un indiaansch Slaven, de se in Florida fangen harrn. In dat 18. Johrhunnert fungen de Muskogee an sück mit britisch Hannelslüüd un flücht afrikaansch Slaven to verheiraaten un to vermischen. Differenzen in de Geographie un de Interaktion mit Europäern f hebbt eventuell dorto führt, dat sück de Muskogee-Städer tonehmend in de „Ünnerstäder“ in dat Grenzland vun Georgia (an de Strööms Chattahoochee River, Ocmulgee River un Flint River) un de „Böverstäder“ in dat Alabama-River-Daal updeelt hebbt.
Revolutionäre Ära
[ännern | Bornkood ännern]So as vööl Gruppen vun de amerikaansch Oorinwahner ööstlich vun den )Mississippi River hebbt sück de Muskogee updeelt, je nahdem, up welker Siet se in‘ Amerikaanschen Unafhängigkeitskrieg stunnen, de Ünneren Muskogee (Lower Creek) bleeven neutral; de Böveren Muskogee (Upper Creek) hebbt sück mit de Briten tegen de Unafhängigkeitskämper verbünnd.
.
Nahdem de Rebellion offiziell 1783 beend weer, keemen de Muskogee dor achter, dat Grootbritannien Muskogee-Land den nee grünnd USA toslahn harr. De Staat Georgia fung an sück in dat Muskogee-Territorium uttodehnen. De Muskogee-Staatsmann Alexander McGillivray wurr berühmt, as he en panindiaanschen Wedderstand tegen dit Indringen upbauen dee un vun de Spaniers in Florida Wapen kreeg, üm tegen vörbitreckend Georgianer to kämpen. McGillivray hett doran arbeit, en Oort Muskogee-Natschonalismus uptobauen un de Führung to zentraliseeren, indem he tegen Dörpvörsteher kämpen dee, de individuell Land an de USA verköfft harrn. Mit den Verdrag vun New York 1790 hett McGillivray en signifikante Menge Land an de USA ünner de Präsidentschap vun George Washington af, in‘ Uttuusch gegen de Anerkennung vun de Souveränität vun de Muskogee in dat verbleeven Territorium. McGillivray is aber 1793 all storven un Georgia dehn sück wieder in‘t Muskogee-Land ut.
De Creek-Krieg
[ännern | Bornkood ännern]De Creek-Krieg van 1813 bit 1814, ok bekannt as "Rootstock-Krieg", fung an as Börgerkrieg binnerhalv vun de Muskogee, blots um sück denn in den Krieg von 1812 to verstricken. Anfüert vun de leedenschaplich Beredsamkeit vun den Shawnee-Führer Tecumseh un hör eegen religiöös Führer hebbt de Muskogee ut de Böverstäder, den Witten as "Rootstocken" (Red Sticks) bekannt, aggressiv tegen dat witt Indringen un de "Ziviliseerensprogramme", de vun den US-Indianeragenten Benjamin Hawkins verwalt wurrn, kämpt. De Rootstock-Führers William Weatherford (Roter Adler), Peter McQueen un Menawa hebbt hart mit de Ünnere Muskogee, anführt vun William McIntosh, de mit de Amerikaners allieert weern, kämpt.
An‘ 30. August 1813 greepen de Rootstocken, anführt vun Roter Adler, den amerikaanschen Butenposten Fort Mims bi Mobile (Alabama) an, wo sück witt Amerikaner un hör indiaansch Allieerten verschanzt harrn. De Rootstocken hebbt dat Fort innahmen un en furchtbar Massaker veranstalt, as se de fangen nommen Lüüd afslacht hebbt. Meest 250 Minschen keemen to Dood – Panik keem in dat süüdwestlich Grenzland vun de USA up.
As Antwoort up dat Massaker vun Fort Mims hebbt Tennessee, Georgia un dat Mississippi-Territorium Armeen deep in dat Land vun de Muskogee schickt. In de Ünnertall un todem slecht bewaffnet hebbt de Rootstocken en vertwiefelten Kamp vun hör in de erricht Festungen utfuchten. An‘ 27. März 1814 hett General Andrew Jacksons Tennessee-Miliz, ünnerstütt vun dat 39. US-Infanterie-Regiment as ok vun Cherokee- un Muskogee-Allieerten denn den Wedderstand vun de Rotstocken in de Slacht am Horseshoe Bend an de Tallapoosa River braken.
Ofschons de Rootstocken vernicht wurrn weern, sünd etwa 3.000 Bövere Muskogee in dissen Krieg to Dood kommen, de vun de restlich Wedderständler vun de Bövere Muskogee noch mehrere Maand uprechthullen wurr. In‘ August 1814 hebbt se sück Andrew Jackson bi Wetumpka (dicht bi de hüüdige Stadt Montgomery (Alabama)). An‘ 9. August 1814 wurrn de Muskogee dwungen, den Verdrag vun Fort Jackson to ünnerschrieven, de den Konflikt beend hett, aber de Muskogee ok verplicht hett, 81.000 km² Land - mehr as de Hälft vun hör oorsprünglich Territoriums – an de USA aftotreden. Ok de Muskogee, de mit Andrew Jackson gemeensam kämpt harrn, mussen Land afgeeven, wiel Jackson hör för den Upstieg vun de Rotstocken verantwoortlich makt hett. De Staat Alabama gung ut dit Land hervör un wurrn 1819 Deel vun de USA.
Dat Verdrieven nah Westen
[ännern | Bornkood ännern]Nah den Krieg van 1812 hebbt eenig Muskogee-Führer as William McIntosh en Antall vun Verdrääg ünnertekend, de mehr un mehr Land an Georgia aftreden deen. Toletzt geev de Muskogee-Bund en Gesett herut, dat jeglich wieder Landaftreden to en Kapitalverbreken verkloor. Liekers hebbt an’ 12. Februar 1825 McIntosh un anner Hööftlinge den Verdrag vun Indian Springs ünnerschreven, de dat meest vun dat noch överblevend Muskogee-Land in Georgia aftreden dee[1].
McIntosh weer en Vedder vun den Gouverneur vun Georgia, George Troup, de de Muskogee as en Bedrohung för de witt Expansion in de Region ankeek, un weer för de Demokraatsch Partei in en Plattform för Indianer-Umsiedeln wählt wurrn. McIntoshs Motive wurrn ünnerscheedlich interpreteert. Eenig Lüüd hebbt glöövt, dat he bestaken wurrn weer, sien Lüüd to verkoopen, annern hebbt seggt, dat he dat begreepen harr, dat de Muskogee all verleeren würrn un he noch dat beste för hör rutslahn wull[2]. Nahdem de US-Senat den Verdrag ratifizeert harr, wurr McIntosh an’ 31. Mai 1825 vun Muskogee, anführt vun Menawa, ümbrocht. (Major Ridge vun de Cherokee verhull sück later nipp un nau so as McIntosh un betall den sülvigen Pries).
De Muskogee-Natschonalrat, anführt vun Opothle Yohola, hett sück bi de USA dorför insett, den Verdrag vun Indian Springs för null un nichtig to verklorren. Präsident John Quincy Adams hatrr Verständnis för de Proteste: 1826 wurr de Verdrag dör en nee Kuntrakt, den Verdrag vun Washington, ersett[3]. De Historiker R. Douglas Hurt schreev dorto: "Die Creek hatten geschafft, was keine Indianernation je getan hatte oder jemals wieder tun wird - die Annullierung eines bereits ratifizierten Vertrags erreicht."[4]
Gouverneur Troup vun Georgia hett den neen Verdrag aber gar nich beacht un fung an, de Indianer gewaltsam to verdrieven, un betruck sück dormit up den eersten Verdrag. Toeerst hett Präsident Adams noch versöcht mit föderalen Truppen intogriepen, aber Troup reep de Miliz tosommen un Adams, de Angst för en Börgerkrieg harr, geev denn nah. He sall an sien Vertrauten middeeelt hemm, dat de "Indianer dat nich weert weern, en Krieg antofangen".
Ofschons de Muskogee ut Georgia verdreeven wurrn weern, wobi völ Ünnere Muskogee in dat Indianerterritorium trucken weern, leeven aber immer noch ruch weg 20.000 Bövere Muskogee in Alabama. De Staat aber gung nu dorbi, Stammesregeeren to verbeeden und hett Staatsgesetten ok up de Muskogee anwendt. Opothle Yohola hett an de Regeeren vun Präsident Andrew Jackson appelleert, se vör Alabama to schulen. As sück aber nichts doon dee, wurrn an‘ 24. März 1832 de Verdrag vun Cusseta ünnertekend, de dat Muskogee-Land in individuell Grundstücken updeel[5]. De Muskogee kunnen entweder hör Land verkoopen, um nah Westen to trecken, oder in Alabama blieven un sück de US- Armee as ok de zivilen Staatsmacht to ünnerdoon. Landspekulatoren un Huusbesetter fungen nu an, de Muskogee dat Leven stuur to maken, dormit se weggahn deen, wat aber Gewaltutbröök führen de, de in de so nömmt "Creek-Krieg vun 1836" ennen deen. De Kriegsminister Lewis Cass hett denn General Winfield Scott en Meldung tosenddt, dat he de gewalt ünnerbinnen sull, indem de Muskogee gewaltsam in‘t Indianerterritorium westlich vun den Mississippi verdreven wurrn.
De offiziell Websteed vun de Muskogee beschrifft de denn folgend Phase vun hör Historie so:
- In der neuen Nation legten die Unteren Muskogee ihre Farmen und Plantagen an den Flüssen Arkansas River und Verdigris River an. Die Oberen Muskogee reetablierten ihre ursprünglichen Städte am Canadian River und seinen nördlichen Zuflüssen. Die Stammesstädte beider Gruppen sandten weiterhin Vertreter zu einem Nationalrat, der sich bei High Springs traf. Die Muskogee-Nation als Ganzes begann eine neue Prosperität zu erfahren[6].
De Muskogee in hüüdig Tiet
[ännern | Bornkood ännern]
De meest Muskogee trucken in’t Indianerterritorium, ofschons sück eenig Lüüd Wedderstand leist hebbt. Deren Nahfohren in Alabama bildt hüüd den „Poarch Band of Creek Indians“, de as eenzig indiaansch Volk up dat Staatsrebeet vun Alabama de staatlich Anerkennung kreegt. Se leevt överwiegend in de Poarch-Creek-Reservation in Atmore noordööstlich vun Mobile. Ebenso leevt en Antall vun Muskogee in nich as Reservatsrebeet klassifizeert Städer in Florida. Tosätzlich leven Nahfohren vun de Muskogee in verscheeden Integrationsgraden över de süüdööstlich US-Staaten verdeelt.
Ofschons de Muskogee-Konföderation en vun de gröttste Indianerorganisationen weerr, führ de Umstand, dat se nah den Creek-Krieg bannig unpopulär weern, dat se för de Assimileeren in anner Stämme un de witt Kultur anfälliger wurrn. 2010 sünd 88.332 Personen to de Muskogee tellt wurrn. Dor leevden bi 56.000 in Oklahoma.
Berühmte Muskogee
[ännern | Bornkood ännern]- Floy Pepper, Meestersche un Erziehungswetenschaplersche ("Lehrer und Schüler lösen Disziplinprobleme")
- Jim Pepper, Jazzmusiker, kombineert Elemente vun de traditschonelle Musik mit Jazz
- Will Sampson, Schauspeler, an berühmtesten för sien Dorstellung in Formans One Flew Over The Cuckoo’s Nest (1975).
Kiek ok
[ännern | Bornkood ännern]Weblenken
[ännern | Bornkood ännern]
- Offiziell Websteed vun de Muscogee (Creek) Nation of Oklahoma (engelsch)
- Historie vun de Muskogee vun Georgia (engelsch)
- Poarch-Creek-Indianer (engelsch)
Borns
[ännern | Bornkood ännern]- ↑ Oklahoma State University Library Electronic Publishing Center: Indian Affairs: Laws and Treaties
- ↑ Houghton Mifflin: [1]
- ↑ Oklahoma State University Library Electronic Publishing Center: Indian Affairs: Laws and Treaties
- ↑ Hurt, R. Douglas, The Indian Frontier: 1763-1846 (Albuquerque: University of New Mexico Press, 2002), p. 148.
- ↑ Oklahoma State University Library Electronic Publishing Center: Indian Affairs: Laws and Treaties
- ↑ Muscogee (Creek) Nation of Oklahoma: Muscogee (Creek) History