Lütte Kiel

Vun Wikipedia
De westlich Deel vun’n Lütten Kiel mit Opernhuus un Raathuustorn in’n Achtergrund.

De Lütte Kiel is en Binnenwater in de Landshööftstadt Kiel. He hett en Verbinnen mit de Kieler Föörd, wat bedüüdt, dat Solt- un Söötwater sik mengeleren deit. He höört to den Stadtdeel Damperhoff.

Wuddeln vun’n Naam[ännern | Bornkood ännern]

Kiel 1910
De Lütte Kiel rechts un de Bootshaven links faat de Ooltstadt in.

Dat Woort Kiel beteekt enen geometrisch Körper, bi den twee Flachen in enen Winkel tosamen lopen doon, so as bi den ünnerst Deel vun en Schipp. In de sleswig-holsteensch Landshööftstadt gifft dat den Groten un den Lütten Kiel: Mit Groten Kiel is de Kieler Föörd meent, de dör’n Gletscher in de verleden Kolttied beschickt wöör, un de Lütte Kiel is also en lütten Arm binnen düssen Kiel.

Historie[ännern | Bornkood ännern]

Bit 1846 weer de Lütte Kiel tosamen mit den Bootshaven vun hüüt en Utlegger vun de Föörd. Dat bedüüdt, dat Water dat Kiel vun dontomal vun all Sieden buten Noorden ümgeev. Dor in’n Noorden weren en fuchtig Rebeet un de Borg vun Kiel, wat vundaag dat Kieler Slott is, de all beid de Stadt schulen deden.

Achteran weer de Deel twischen Lütte Kiel un Bootshaven smaller maakt, dormit de Holstenbrüch grötter maakt warrn kunn. 1889 bo de Stadt en Holtbrüch, de de Ooltstadt mit den Stadtdeel Damperhoff verbindt. 1909 weer düsse Stell verjüngt un en ne’e Brüch ut Iesen opstellt.

1904 weer de Verbinnen twischen Lütte Kiel vun de Föörd ünnereerdsch maakt, un de Holstenbrüch geev dat blots noch in den Stratennaam. Datsülvige hebbt se ok bi’n Bootshaven 1982 ümsett.

Ne’e Arbeiden[ännern | Bornkood ännern]

Siet 2008 gifft dat jümmers wedder de Idee, de histoorsche Verbinnen weddertohaalen[1]. Dat Projet schull en Oort beschicken, de de Minschen to’n Töven un Verpuusten in de Ooltstadt inladen deit. Seven Johr later maakt de Boutschuss Eernst un will den Lütten-Kiel-Kanal ümsetten. De Platz schall ’n poor Bööm un anner Planten afkregen un de Straat Holstenbrüch schall blots den Stadtbussen tostahn avers för all anner motoriseerten Verkehr verbaden wesen[2]. 2016 hollen de Kieler Narichten en Ümfraag över en Naam för den Kanal[3]. De mehrsten Lüüd wullt den Kanal Holsten-Fleet nömen. De Ümfraag vun’t Daagblatt weer blots en Vörslag to’n Stadtraat un is keen Verplichten, dat he later so heten schall. De Boplan seht vör, dat in’t dritten Viddel vun 2017 mit den Deepboarbeiden anfungen warrt. De ne’e Verbinnen twischen Lütte Kiel un Bootshaven schall in’t dritten Viddel vun 2019 fertig wesen[4].

Enkelt Nahwiesen[ännern | Bornkood ännern]

  1. Akschoon Ja! Kleiner Kiel Kanal vun Förderkreis Kieler Altstadt e.V. (dt.) (opropen 04.12.2017)
  2. Stadt Kiel: Lütte-Kiel-Kanal. (dt.) (opropen 04.12.2017)
  3. Drexler, M. (2016): Fief Naams för den Lütten-Kiel-Kanal. in Kieler Nachrichten. (dt.) (opropen 04.12.2017)
  4. Lade, A.: Faken fraagt un de Antern. in: Stadt Kiel. (dt.) (opropen 04.12.2017)