Karl-Emil Schade
Karl-Emil Schade (* 5. Juli 1927 in Itzehoe; † 17. Dezember 2007 in Itzehoe) weer en lutherschen Paster un Översetter vun de ganze Bibel ut de verscheden Uurspraken in sien Holsteener Platt.
Leven un Wark
[ännern | Bornkood ännern]Schade is in Itzehoe up dat Kaiser-Karl-Gymnasium na School gahn un hett dor up'e School ok Platt lehrt. In'n Tweeten Weltkrieg hett he as Marineinfanterist bi de Düütsche Wehrmacht deent. 1957 keem he as Paster na Hanerau-Hademarschen. 1987 möss he dor vunwegen sien Gesundheit Bott geven. He hett denn vun de Nordelbische Landskark den Updrag kregen, dat Ole Testament in de Plattdüütsche Spraak to översetten. Acht Johr hett he dor an seten. Al 1992 konn de de Psalmen up Platt rutgeven. 1995 bröch he dat Ole Testament un 2001 de Apokryphen rut. Denn folg dat Nee Testament 2003. Amenn hett he ok noch Martin Luther sien Katechissen översett un rutbröcht. Dat hett em den Ökelnaam 'De Luther vun Hademarschen' inbröcht. 2003 hefft se em dat 'Bundsverdeenstkrüüz' verlehnt un 2006 is he mit den 'Sleswig-Holsteenschen Spraakpries' ehrt wurrn. He weer 50 Johr mit sien Fro Elke verheiroot, de in'n Juni 2007 storven is. Mit ehr hett he twee Söhns un veer Döchter harrt.
Böker Vun Karl-Emil Schade
[ännern | Bornkood ännern]- Dat Ole Testament, översett ut den Uurtext vun Karl-Emil Schade, Niemönster, 1995 (nu al in'e 3. Uplaag) ISBN 3-529-04958-1
- De Apokryphen, Verborgen Schriften ut dat Ole Testament, Niemönster, 2001 ISBN 3-529-04960-0
- Dat Niee Testament, Niemönster ISBN 3-529-04961-1
- De Psalmen Plattdüütsch, Niemönster 1992, ISBN 3-529-04956-5
- De lütte Katechissen vun D. Martin Luther, Niemönster, 2005, ISBN 3-529-04962-x