Justus Christoph Leist
Justus Christoph Leist (* 24. März 1770 in Rethen; † 30. April 1858 in Celle) weer en düütschen Jurist un Politiker.
Leist is 1770 in Rethen boren. He hett von 1789 af an Juristeree an de Universität Göttingen studeert un dat Studium 1792 as Dr. jur. afslaten.[1] Leist is denn reist un is ünner annern na Wien gahn, üm dor de Praxis an dat Riekshoffgericht kennen to lehren.[1] 1795 is he na Göttingen trügg un weer dor außerordentlichen Perfesser.[1] In dat Johr 1802 is he dor ordentlichen Perfesser worrn.[1] Sien Lehrbook von dat düütsche Staatsrecht müss von wegen den Rieksdeputatschoonshauptsluss 1803 ut’n Druck nahmen un ümschreven warrn.[1] He is 1805 Hoffraad worrn, güng denn aver in’n Deenst von dat Königriek Westfalen in Kassel un weer Maat von’n Staatsraad.[1] 1809 is he as Nafolger von Johannes von Müller Direkter von’n öffentlichen Ünnerricht worrn.[1] In düt Amt harr he op de een Sied dat Enn von de Universitäten Rinteln und Helmstidde aftowickeln, aver kunn doch de Universitäten Halle, Marburg un Göttingen fördern.[1] Hart dee he de Landsmannschaften an de Universitäten verfolgen, wodör dat in Göttingen in’n September 1809 to de Schandarmen-Affäär keem.[2] Von König Jérôme is he an’n 10. Januar 1810 in’n Freeherrnstand goven worrn un hett kort later den Ridderorden von de westfäälsche Kroon kregen.[1]
Nadem dat mit dat Königriek Westfalen un de Herrschop von de Franzosen toenn weer, is em de Neegd to de Franzosen slecht kamen. He hett Titel un Rang verloren un is as Kloosteramtmann na Ilfeld versett worrn, wat en ringen Posten för em weer.[1] Aver al 1817 hebbt sien Kenntnisse von Staats- un Karkenrecht dorto föhrt, dat he Legatschoonsraad worrn is.[1] He is mit Friedrich von Ompteda na Room schickt worrn, üm en Konkordat mit de Kathoolsche Kark aftosluten.[1] Na düsse Reis keem he 1819 na Ilfeld trügg.[1] 1829 güng he as Nafolger von Georg Friedrich Falcke na Stood un is dor Direkter von de Justizkanzlie Stood un dat Hoffgericht Stood worrn.[1] Ok dat Amt as Direkter von dat Kunsistorjen in Stood weer dor mit verbunnen. In de Tied von’n Verfatenskunflikt 1837 weer he Berader von König Ernst August I.[1] Ernst August weer 1837 an de Macht kamen, aver wull dat Staatsgrundgesett von 1833 nich anerkennen.[1] Leist hett för Ernst August dat Verscheel vertreden, dat de Verfaten von 1819 wedder herstellt warrn müss.[1] Ünner annern hett he dat vör’n Bundsdag von’n Düütschen Bund so vertreden. So is he to’n 21. Januar 1839 ok Maat von’n Staatsraad von dat Königriek Hannover worrn.[1] 1839 keem Leist as Viezpräsident an dat Oberappellatschoonsgericht Celle, wat he bet to sien Dood 1858 bleven is.[1] 1855 is he tosätzlich Präsident von’n ne’en Staatsgerichtshoff von dat Königriek Hannover worrn.[1]