Jonas Hector

Vun Wikipedia
Jonas Hector (2018)

Jonas Hector (* 27. Mai 1990 in Saarbrücken) is en düütsch Footballspeler. He speelt för den 1. FC Köln. Meest wurrd he as Linksverteidiger, af un to aber ok in dat defensiv Middelfeld insett.[1]

Karriere as Footballprofi[ännern | Bornkood ännern]

Vereen[ännern | Bornkood ännern]

In dat Öller vun 18 Johren kunn sück de in dat saarländsch Kleinblittersdorf-Auersmacher upwussen[2] Hector noch nich vörstellen, Footballprofi to wurrn. En entspreekend Angebot vun den VfL Bochum hett he nah den Upsptieg vun sien Heimatvereen SV Auersmacher in de Football-Böverliga Rhienland-Palz/Saar in dat Johr 2009 aflehnt.[3] In’ Sömmer 2010 is he denn aber doch to de U-21-Mannschap vun den 1. FC Köln wesselt. Twee Johr later gelung den 1,85 grooten Speler ünner Trainer Holger Stanislawski de Sprung in de Profimannschap. Dor hett he as Afwehrspeler an’ 18. August 2012 sien Profidebüt in de DFB-Pokal-Begegnung vun den 1. FC Köln gegen de SpVgg Unterhaching (2:1) geven.[4] Sien eerst Tweetligaspeel hett Hector an’ 27. August 2012 maakt. Sien Debüt in de Bundsliga geev he an’ 23. August 2014 (1. Speeldag) bi dat 0:0 in dat Heimspeel gegen den Hamborger SV; sien eerst Bundsligadoor hett he an‘ 4. Oktober 2014 (7. Speeldag) bi de 2:3-Nedderlaag in dat Utwärtsspeel gegen Eintracht Frankfurt in de 66. Minute mit dat Door to’n 2:2 schaaten.

Sien Verdrag bi den 1. FC Köln löppt bit 2021.[5]

Natschonalmannschap[ännern | Bornkood ännern]

An‘ 7. November 2014 wurr Hector eerstmals in de düütsch Natschonalmannschap beropen. Tovör harr he weder in en Jöögdleistungszentrum noch in en Junioren-Natschonalmannschap speelt.[6]. Bundestrainer Joachim Löw hett hüm denn in dat Lännerspeel an‘ 14. November 2014 gegen Gibraltar in de 72. Minüüt för Erik Durm inwesselt. Hector stunn 2015 as eenzig Natschonalspeler in all negen Spelen in de Startelf un speel immer över de vull Distanz – mit Utnahm vun dat letzt Speel gegen Frankriek, in dat he wegen en Besehren vör de Tiet utwesselt wurr. Hector hett ok an de Football-Europameesterschap 2016 deelnommen un hett all söss Turnierspelen över de vull Distanz bestreeden. An‘ 2. Juli 2016 hett he in dat Veertelfinalspeel gegen Italien in dat Elfmeterscheeten den entscheeden Elfmeter to den Intoog vun de düütsch Natschonalmannschap in dat Halffinale verwannelt[7] In‘ Ansluss an dat Speel wurr he to’n „Man of the Match“ wählt.[8] Hector stunn in den Kader vun de DFB-Utwahl bi den Konföderatschonen-Pokal 2017 in Russland.[9] In dat Turnier keem he up veer Insätze, dorünner dat Finale gegen Chile, dat mit 1:0 wunnen wurr.

Bit hüüd (Stand 6. September 2017) hett he 35 Lännerspelen maakt un dorbi 3 Doren schaaten.

Utbillen[ännern | Bornkood ännern]

Hector hett 2008 an dat Ludwigsgymnasium in Saarbrücken dat Abitur afleggt. Siet 2014 studeert he in en Feernstudium Bedrievswertschapslehre an de Universität Ollnborg.[10]

Weblenken[ännern | Bornkood ännern]

Jonas Hector. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. Positionen laut transfermarkt.de
  2. Jannis Johannmeier un Daniel Fischer: [1] „Wenn Jonas verlor, flossen Tränen!“, Bild; Axel Springer Verlag SE van’ 14. November 2014, afropen an’ 31. August 2017
  3. Sebastian Fischer: Matchwinner Jonas Hector – Made in Köln, Süddeutsche Zeitung, 3. Juli 2016, afropen an’ 3. Juli 2016.
  4. Michael Krämer: Jonas Hector: Musterschüler vom SV Auersmacher, Kölner Stadt-Anzeiger, 19. August 2012, afropen an’ 29. August 2012
  5. Meldung vun den 1. FC Köln, afropen an’ 13. August 2016
  6. [2] DFB-Neuling Hector: Plötzlich Nationalspieler; Spiegel Online, afropen an‘ 5. Juli 2016
  7. [3] Jonas Hector trifft den letzten Elfer und Deutschland feiert den Sieg gegen Italien] in Pforzheimer Zeitung van‘ 2. Juli 2016. Afropen an‘ 2. Juli 2016.
  8. [4] Hector ist "Spieler des Italien-Spiels", afropen an‘ 5. Juli 2016
  9. [5] Das ist der deutsche Kader für den Confed Cup 2017; TZ.de van‘ 19. Juni 2017 afropen an den sülvigen Dag.
  10. Elfmeter-Held: Jonas Hector studiert in Oldenburg in Osnabrücker Zeitung van‘ 3. Juli 2016. Afropen an‘ 3. Juli 2016.