Joachim Stünker

Joachim Stünker (* 29. März 1948 in Langwedel) is en düütschen Politiker von de SPD.

Leven

Stünker is 1948 in Langwedel boren. Na dat Abitur 1967 an dat Gymnasium an’n Wall in Veern hett he Juristeree an de Fre’e Universität Berlin un de Universität Göttingen studeert. Dat Studium hett he 1973 mit dat eerste juristische Staatsexamen afslaten. Na sien Referendariat hett he 1975 dat twete Staatsexamen bestahn un weer denn Richter. He weer siet 1990 Vorsitzender Richter an’t Landgericht Veern.

Joachim Stünker is verheiraadt un hett twee Kinner.

Politik

Al as Schöler is Stünker 1965 in’e SPD rin. 1976 is he in’n Gemeenraad von de Gemeen Langwedel wählt worrn un 1986 in’n Kreisdag von’n Landkreis Veern. He is bet 2001 ehrenamtlichen Börgermeester von Langwedel bleven.

Von 1998 bet 2009 weer he Maat von’n Düütschen Bundsdag. Nadem he von 1998 bet 2002 toeerst Viez-Spreker weer, is he von Oktober 2002 bet 2009 Spreker von de Arbeidsgrupp Rechtspolitik von de SPD-Frakschoon in’n Bundsdag ween. Von November 2004 bet November 2005 un von Oktober 2007 bet he na de Wahl 2009 ut’n Bundsdag rut is hett he to’n Vörstand von de SPD-Frakschoon höört. Stünker weer ok Maat von dat Parlamentarische Kuntrullgremium in’n Bundsdag, dat de Arbeid von de Geheemdeensten överwaakt.

Stünker is een von de Oorhevers von dat Patschentenverfögungsgesett von 2009. De „Stünker-Entwurf“ gellt siet September 2009.

Stünker is bi de Wahl 1998 as direkt wählten Afornten (53,4 % von de Eerststimmen) in’n Wahlkreis Veern-Oosterholt un bi de Wahlen 2002 un 2005 in’n Wahlkreis Rodenborg-Veern in’n Bundsdag intagen. Bi de Wahl 2002 hett he 47,7 % von de Stimmen kregen un bi de Wahl 2005 44,2 %. Bi de Bundsdagswahl 2009 hett he 36,6 % von de Stimmen kregen un kunn sik nich gegen Andreas Mattfeldt von de CDU dörsetten. Ok över de Landslist von de SPD Neddersassen kunn he nich in’n Bundsdag intehn un is ut’n Bundsdag utscheden. He hett denn seggt, dat sien polietsche Karjeer toenn is.

Stünker is in siene Positschoon an’t Landgericht Veern trügggahn un in’n Mai 2014 in Rohstand gahn.