Intermodal Verkehr
Intermodalen Verkehr is en Verkehr, de mit tominnst twee unnerscheedliche Verkehrsdregers (Iesenbahn, LKW, Frachtschipp, Frachtfleger) tostanne kummt. En beten wat allgemeener warrt ok en Verkehr sö nömmt, wo dat Transport-Fohrtüüch wesselt warrt un bi dat Umsetten en Grootkist bruukt warrt.
Dat Woort Intermodalität is toeerst in den Göder-Transport upkamen un to'n eersten Mol in de USA in de 1960er Johre bruukt wurrn. Dormols sund Standard-Containers inföhrt wurrn, de mit de Iesenbahn, den LKW oder dat Schipp transporteert weern konnen. Mit dat Upkamen vun de Containers sund de enkelten Verkehrsmiddels in den Achtergrund träen un de Transportkeed „inter modes“, twuschen verschedene Verkehrsdregers un -techniken is na vörn kamen. „Intermodal“ bedutt, datt, t.B., en Lastkraftwagen for en Deel vun sien Weg mit de Iesenbahn mitföhrt (Huckepack-Verkehr), dat Afholen un Henbringen vun de Fracht passeert dorbi up de Straten. So gifft dat bannig veel Kombinatschonen, wie See- un Binnenscheepe, Stratenfohrtüge, Iesenbahnen, Pipelines un ok Flegers tohopenknütt weern könnt.
De intermodale Verkehr warrt hüdigendags allgemeen as en Middel ankeken, wo de Umweltlast mit dalbrocht weern kann un wo dat mit hen to kriegen is, datt dat Straten un Autobahnen nich to vull sund. Wenn dat en ideale Verkehrsweertschop geven dö, denn so wurr jedet Verkehrsmiddel na siene sunnerlichen Vordeele insett un up düsse Aart keem dat dor faken to, dat Transportproblem dör en Kombinatschoon vun Verkehrsmiddels up to lösen. So weer dat ok vun de Bedriefsweertschop her richtig un de Gesamtweertschop konn sik dat blot man wünschen.
Literatur
[ännern | Bornkood ännern]- European Intermodal Association EIA (Hrsg.): Intermodal Transport in Europe Brussels 2005 - [1]
- UNCTAD: Fostering competitive multimodal transport services. 1995 - hier to'n Afropen
- UNCTAD/ICC: Rules for Multimodal Transport Documents. - hier to'n Afropen