Hinrich Zahrenhusen

Hinrich Johann Daniel Zahrenhusen (* 2. März 1875 in Hornborg; † 19. Januar 1940 in Bremen) weer en noorddütschen Naamforscher.

Zahrenhusen is as Söhn von en Garver in Hornborg boren. Blangen de Volksschool hett he sik dör Privaat- un Sülvsünnerricht wiederbillt un von September 1892 bet September 1895 dat Seminar in Stood besöcht. To’n 1. Oktober 1895 is he Schoolmeester an en Volksschool in Geestmünn worrn. 1903 hett he an de Universität Jena Vörlesungen för Düütsche Philologie, Geschicht un Philosophie besöcht. Eerst nadem he sien Studium al anfungen harr, hett he an’n 11. März 1905 op dat Gymnasium Carolo-Alexandrinum in Jena sien Abiturprüfung maakt. In’n Sommer 1906 hett Zahrenhusen sik in Jena exmatrikuleert un weer wedder Schoolmeester in Geestmünn. He hett denn an’n 2. Februar 1907 in Jena de Prüfung as Persetter bestahn un is to’n 1. Juli Oberlehrer an dat Lehrerinnenseminar in Droyßig worrn. Dor hett he denn ok sien Dokterarbeid över den plattdüütschen Dialekt von sien Heimatdörp schreven: Lautstand der Mundart von Horneburg (Hannover).

An’n 1. Juli 1910 güng Zahrenhusen an de Kaiserin-Auguste-Victoria-School in Emden un is denn al an’n 1. April 1911 as Nafolger von August Ernst Zwitzers Direkter von de School worrn. Dat is he bleven bet he to’n 1. April 1937 in Pension gahn is. He hett sik blangenbi denn veel mit de Naamforschung beschäftigt, de eerste Tied to de Naams von siene Heimat op de Stoder Geest, later denn to de Naams ut Oostfreesland.

Zahrenhusen hett an’n 24. März 1906 in Geestmünn Martha Henny Peters freet, mit de he twee Döchter un twee Söhns harr. In’n Oktober 1939 is he na Bremen ümtrocken, dat he dichter bi de Archivs in Bremen weer un ok, dat he dichter bi siene Kinner weer, de in Bremen leven deen. Zahrenhusen is denn 1940 na en Operatschoon doodbleven.

Warken

• Lautstand der Mundart von Horneburg (Hannover). Geibel, Hannover 1909
• Ingävonische Spuren in unsern heimischen Personen- und Ortsnamen. in: Stader Archiv N.F. 16, 1926, S. 33-51
• Einige ältere Frauennamen unserer Heimat. in: ebd. 17, 1927, S. 158-172
• Die Personennamen (Taufnamen) des ältesten Stader Stadtbuches von 1286-1339. in: ebd. 18, 1928, S. 30-96
• Ein Verzeichnis der Staatsforsten unserer Heimat aus dem 17. Jahrhundert. in: ebd. 19, 1929, S. 80-90
• Die Zunamen des ältesten Stader Stadtbuches von 1286-1339. in: ebd. 22, 1932, S. 1-16; T. 2, in: ebd. 26, 1936, S. 114-128; 27, 1937, S. 239-243
• Ostfriesische Vornamen. Die in Ostfriesland gebräuchlichen Rufnamen, zusammengestellt und auf der Grundlage der germanischen Namenbildung bearb. Mit einem Anhang: Verzeichnis guter ostfriesischer Vornamen. rutgeven von de Oostfreesch Landschap in Auerk, Emden 1939